Ramiro I d’Asturies foi rei ente los años 842 y 850. Yera fíu del rei Bermudo I d’Asturies y de la reina Uzenda Nunilona, mesmo que nietu de Fruela de Cantabria y bisnietu de Pedro de Cantabria. Ramiro I xube al tronu cola muerte d’Alfonso II «El Castu» nel añu 842. Según la Crónica Najerense, Ramiro taba en Bardulias pa contrayer matrimoniu cuando lu escoyeron socesor de la corona. Un conde próximu a la corte, de nome Nepociano, cuñáu del rei fináu, aprovechó l’ausencia del futuru monarca pa xubir al tronu de forma ilexítima.
El descubrimientu
El rei Ramiro I fundó nel monte Naranco un conxuntu de construcciones palaciegues y relixoses que se ven reflexaes nes Cróniques d’Alfonso III. Les actuales obres de caltenimientu del monumentu prerrománicu llevaron al afayu d’una llábana que podría pertenecer al sarcófagu del monarca asturianu.
Les primeres conclusiones de la investigación de los técnicos del Muséu Arqueolóxicu d’Asturies apunten a que’l monumentu prerrománicu construyóse p’agospiar la tumba del monarca asturianu. Les obres impulsaes por Cultura entamaron pa solucionar filtraciones d’agua nel edificiu na fachada norte, onde precisamente s’alcuentra la escalinata y l’antepar oxetu de restauración nel que s’atopó la llábana que se cree sirviría de base pal sarcófagu.
Los arqueólogos aprovecharon esti descubrimientu pa desvelar el sentíu y la cronoloxía de la llosa, un elementu independiente dafechu del pavimentu nel antepar d’accesu a la sala central del monumentu.
La llosa
Na llosa atopáronse más de 25 fragmentos nos que ta quebrada la llosa del antepar d’entrada a Santa María del Naranco. Según l’arqueólogu César García de Castro, el monarca asturianu mandó construyir Santa María pa enterrase ellí, asina que’l templu prerrománicu podría concebise naquella dómina como un mausoléu, concretamente nel añu 850.
Esti descubrimientu fai que la hestoria oficial de los monumentos del Naranco cambie dafechu. García de Castro ufiertó una esplicación de los pasos daos na investigación, entamando nel añu 1995, onde llamó per primer vegada l’atención sobre esa piedra encastrada nel pavimentu del antepar del templu. Trenta años más tarde l’arqueólogu del Principáu vio na obra de saneamientu y reacondicionamientu de la contorna de Santa María una oportunidá pa poder estrayer la llosa y analizala.
Cuando sacaron la piedra pa da-y la vuelta confirmaron que la llosa nun se moviera enxamás. Podía atestiguase qu’una metá, la menos rota, fuera encastrada mientres la construcción del edificiu, que yera un elementu estructural orixinal. La otra metá, mui rota, sedría removida, quiciabes pa ver si había daqué debaxo.
Hai la dulda de si la llosa nunca se movió. ¿Quién nel sieglu IX tenía capacidá pa facese con una pieza de caliza d’esi calibre y tresportala hasta ellí? Solo podría ser el mesmu Ramiro I. García de Castro atopa la postrer de les pistes nel marcu que soporta l’arcu del antepar. Na so base, xusto nel puntu exactu onde s’asitia ún de los estremos de la llosa, hai un rebaxe de cantería, una ranura orixinal de 45 centímetros d’altu que coincide con esa forqueta d’ente 39 y 55 centímetros que tienen los sarcófagos conocíos n’Asturies ente los sieglos IX y XIII.
Namás queda esperar los resultaos de les investigaciones, mesmo que futures escavaciones que saquen a la lluz y qu’aporten datos nuevos pa poder reconstruyir la historia d’ún de los elementos más importantes del reinu d’Asturies.
