Col bon tiempu del branu, lo que pide’l cuerpu ye daqué fresco. Una bona receta pa ello, ensin perder la esencia asturiana, ye’l sorbete de sidra y mazana. Darréu, amosámosvos esta receta cenciella pa que la esfrutes nel to descansu braniegu.
Ingredientes
7 mazanes grandes
2 zusmios de llimones
240 ml sidra natural
500 gr zucre
900 ml agua
6 cucharaes de zucre invertío
Preparación
Empezamos descorazonando les mazanes y pulgándoles, cortámosles en trozos y ponémosles nun envase xunto col zusmiu de los llimones y 50 ml de sidra. Entemecémoslo bien, tapámoslo y guardámoslo nel conxelador una hora y media.
De siguío nun cazu vamos poner l’agua, xunto col restu de la sidra y l’azucre, hasta consiguir un almibre a puntu de bola, ye dicir, trupio. Cuando yá tenemos l’almibre, sacamos les mazanes del conxelador y esmagayámoslo, añedimos l’azucre invertío y l’almibre y volvemos esmagayar y entemecer bien con una cuyar de madera.
Como la mazana taba conxelada, l’amiestu ta lo suficientemente frío pa poder ponelo na xeladera, onde lo dexaremos 45 minutos. Si al cabu d’esti tiempu nun nos quedó la consistencia deseyada, pue metese nun envase nel conxelador.
¡Y llisto! ¡A esfrutar d’ello!
