Fondu y desconocíu, el cañón d’Avilés podría ser consideráu’l monumentu natural más importante d’Asturies. Asitiáu a 12 quilómetros de la mariña asturiana, ye’l valle somarín más fondu del mundu: entama a 128 metros de fondura y tien alredor de 75 kilómetros de llargor.
El cañón d’Avilés foi’l primer petón de coral d’agua frío que s’atopó n’España. Foi un descubrimientu bien importante a nivel científicu, yá que se desconocía que los corales pudieren habitar fuera d’agües templaes y clares. Corales blancos, mariellos, prietos, esponxes de cristal o anémonas formen parte d’esti petón, qu’amás ye l’hábitat de delles especies d’interés comercial, polo que’l so caltenimientu ye necesariu pa garantizar la sostenibilidá de la pesca na mariña asturiana.
Anque esti valle somarín sigue siendo bastante misteriosu pola dificultá que tenemos d’aportar, sí que sabemos qu’alluga una gran biodiversidá y riqueza biolóxica. Nél conviven un ensame d’especies de lo más peculiares: el tiburón anguila, el tosquile albín, el tiburón duende, el pixapu espinosu… Llamen l’atención especialmente les estrelles de mar o roncheles xigantes (con hasta diez brazos), los cachalotes, o la gran población d’esponxes carnívores; pero quiciabes la especie más espectacular ye’l kraken, el calamar xigante del que yá falaben los griegos y que describía Xulio Verne en «Venti mil llegües de viaxe somarín».
