El suroccidente asturianu, y concretamente la comarca d’Os Ozcos, ye una zona por descubrir y con munches ayalgues escondíes nel so territoriu. Un día nesti espaciu ye una invitación a esfrutar de la bayura cultural, hestórica y natural de trés conceyos únicos: Santalla, Samartín y Vilanova d’Ozcos. Declarada Reserva de la Biosfera pola UNESCO, esta comarca ufierta una esperiencia auténtica y única pa quien busca escapar de la rutina y reconectar cola naturaleza, la hestoria y la tradición rural asturiana.
Rutes de senderismu pela mañana
Pa entamar el día, una caminada per dalguna de les numberoses rutes de senderismu ye imprescindible. Una opción popular ye la Ruta da Coba, un percorríu circular d’unos 7 quilómetros qu’empieza nel pueblu de Santalla y lleva a los andariegos al traviés de montes y praos. Esti trayeutu inclúi’l pasu per un tabayón y per molinos d’agua antiguos, que dan cuenta de la importancia de la tradición rural na contorna. Otra opción ye la Ruta da Mina Carmina en Vilanova d’Ozcos, que s’adientra n’antigües mines y ufierta unes vistes espectaculares de los montes.
Pa los aventureros, la Sienda Verde das Cascascadas de San Pedro d’Agüeira ye un percorríu más esixente que lleva hasta dellos tabayones y poces d’agua cristalino, perfectes pa enfrescase nos díes calorosos de branu. Amás de ser una inmersión na naturaleza, estes rutes dexen afayar antiguos horros y casones de piedra que paecen sacaes d’otra dómina.
Cultura y hestoria al meudía
Al meudía, un percorríu pelos pueblos de la comarca ufierta una inmersión na cultura llocal. Santalla d’Ozcos cunta col Museo Casa Natal del Marqués de Sargadelos, un personaxe históricu del territoriu y fundador de la famosa fábrica de cerámica. Esti muséu dexa esplorar la hestoria de la comarca y conocer detalles sobre la vida nel sieglu XVIII. En Samartín d’Ozcos, el Museo da Casa del Marco amuesa cómo yera una casa tradicional d’Asturies, caltenida con tolos sos elementos y preseos orixinales.
Oficios tradicionales pela tarde
Pela tarde, una actividá fascinante n’Os Ozcos ye conocer los sos oficios tradicionales. Una visita al Ecomuseo del Pan en Vilanova d’Ozcos ye una oportunidá pa ver cómo se fai’l pan de manera artesanal, siguiendo téuniques antigües y con ingredientes llocales.
Otra parada esencial ye na forxa de Mazonovo, un taller de ferrería con más de 300 años d’hestoria nel que los ferreros faen pieces de fierro de manera tradicional. Equí pueden vese demostraciones de forxa nes que’l fierru toma forma cola calor y l’habilidá de los ferreros, una práctica que recuerda l’importante pasáu mineru y metalúrxicu de la comarca suroccidental.
Si esta opción nun t’interesa, puedes siguir la to visita en Vilanova d’Ozcos pa conocer l’impresionante Monesteriu de Santa María de Vilanova, una xoya de l’arquitectura medieval n’Asturies. Fundáu nel sieglu XII por monxos cistercienses, el monesteriu foi restauráu con munchu procuru y ye güei unu de los patrimonios más importantes de la comarca. Mientres la visita, vas poder esplorar el claustru, la ilesia y los xardinos, y deprender sobre la vida monástica y la so influencia na hestoria y el desenvolvimientu d’Os Ozcos.
Al atapecer: cielos d'estrelles
Pa terminar el día, nada meyor qu’un paséu al atapecer pelos caminos tranquilos y poco allumaos de la comarca d’Os Ozcos. La baxa contaminación llumínica de los Ozcos convierte los sos cielos nocherniegos nun escenariu ideal pa la observación d’estrelles. Con suerte y en nueches ensin ñubes tapando’l cielu, pueden vese constelaciones completes y esfrutar del silenciu y la paz que llega a tolos requexos de la comarca.
Un día na Comarca d’Os Ozcos ye una esperiencia pa conectar cola naturaleza, la hestoria y les tradiciones d’una de les zones más auténtiques y conservaes d’Asturies. Ente caminates, bona comida y un fondu respetu polos sos raigaños, esti requexín asturianu convida a tornar a un ritmu de vida cenciellu y plenu, seliquín, en sintonía cola contorna.
