N’Asturies hai bien de cementerios que visitar, talos como’l de La Carriona, n’Avilés, o’l Cementeriu municipal de L.luarca, nel conceyu Valdés, ente munchos otros. Sicasí, hai ún nel oriente, na parroquia llanisca de Niembru, que ta arrodiáu d’un paisaxe únicu.

El Cementeriu de Niembru, ta situáu ente Barru y Niembru, nel conceyu Llanes, concretamente nuna pequeña península natural formada na Ría de Barru na que tamién s’alcuentra la ilesia de Nuestra Señora de los Dolores. Esti emplazamientu tan especial fai que, cola pleamar, puedan vese unes vistes enllenes de maxa, cola silueta d’esti campusantu y la so ilesia reflexada nes agües tranquiles de la ría. Mientres tanto, cuando esti llugar ta nes hores de baxamar, conviértese nun pedregal, paeciendo un sitiu totalmente distintu, ensin asemeyances colo que unes hores enantes o dempués pueda vese. Esti llugar fundóse a la fin del sieglu XVIII y antaño la ensenada taba enllena de barcos, que cargaben les sos mercancies xusto nesi puntu, y que dempués diben dir pa Francia.

Estes condiciones tan úniques ficieron que dellos directores de cine plantegaran filmar equí dalgunes de les partes de les sos obres cinematográfiques. Películes como El Abuelo, de Jose Luís Garci y Epílogode Fernando Fernán-Gómez foron grabaes equí, pero tamién series como La Señora, onde apaecen actores como Adriana Ugarte o Rodolfo Sancho. L’apaición nestes obres ye amás un potenciador turísticu, yá que’l llugar ta dientro del itinerariu cultural Llanes de cine, que percuerre dellos puntos del conceyu Llanes cuntando la hestoria de los sets de grabación de delles películes y series.