Los Reis del Goxu y la Faba y el Coleutivu Abillés Antroxu Tradicional, consiguieron sacar de les tiniebles a “El Cornelu”, faciéndolo tornar de nuevu al conceyu d'Avilés, pol que transita fai más de 80 años. 

La Vieya, el nuesu queríu personaxe máxicu del Antroxu tradicional avilesín, yá nun ta sola. Otra de les fuerces de naturaleza torna dende la escuridá para protexer a la Comarca d'Avilés. 

Los trabayos realizaos mientres estos años, revisando fontes hemerográfiques y principalmente realizando entrevistes a distintos informantes tán dexando recrear como seríen dalgunos de los mazcaritos que “corrieron l’Antroxu”, na Comarca d'Avilés, mientres el primer terciu del sieglu XX.  

Nel casu d“El Cornelu o Diablu”, pel momentu nun s'atoparon referencies escrites, les fontes son orales, siendo fundamentales les descripciones realizaes por José Rodríguez Valdés, conocíu como Pepe Venancia, el de Miranda. 

Esti estudiu, complementóse cola escelente recreación del traxe realizada por Raquel Vega de “Vezos y Costumes”. Raquel, especialista en indumentaria tradicional (col asesoramientu d'Alberto Álvarez Peña), intentó plasmar tolos detalles descritos por Pepe Venancia qu'a los sos 93 años sigue calteniendo una memoria prodixosa. 

La resultancia como diz Sara Vega, miembru de los Reis del Goxu y la Faba, nun puede ser meyor. Cuando vi la recreación, encantóme, ye una pasada y dende el mio puntu de vista tien un gran potencial. 

Dempués de ver la recreación, Pepe Venancia (22-01-2022) considera que la recreación ta perbién, un trabayu escelente. Sicasí, comenta que lo recuerda más puercu. Yera más feu y daba más mieu.  

Nesta última conversación calteníes col informante, cúntanos que probablemente, a esti personaxe pudo vése-y per última vegada, al rodiu de 1935 o 1936. Cola Guerra Civil, la mayoría d'estes manifestaciones culturales, que yá nun s'atopaben nel so meyor momentu, acabaron sumiendo. Dempués de la Guerra Civil solo se “mazcaritaban”, con ropes vieyes, sacos y pieles, dellos neños y chavalucos adolescentes.  

Estes manifestaciones culturales, tienen el so orixe en ritos estacionales, festividaes de calter agrariu rellacionaes cola llegada del nuevu ciclu de la vida. La naturaleza reinventábase. En tiempu d'Antroxu empezaben los preparativos por que los semaos, de los que dependíen l'ésitu de les futures colleches, fueren prósperos. 

En dómina prerromana, estos personaxes representaben deidaes, fuerces vives de la naturaleza, que de forma simbólica intentaben dar esplicación a munches de les entrugues que, entós daquella, inda nun teníen respuesta. 

A esti tipu de personaxes, cubiertos con pieles d'animales, con grandes cornamentes, barba y una petrina del que colgaben llueques, cola influencia del cristianismu empezóse-yos a llamar “diaños”. Sicasí, como venimos diciendo, nel so orixe yeren entidaes cimeres, divinidaes paganes qu'apaecíen mientres estos díes escuros del añu. Yeren seres de la escuridá, que col ruiu de les sos llueques estornaben a los malos espíritos, que podíen afectar negativamente el desenvolvimientu de la vida cotidiana de les persones, de los animales y de les colleches. 

Nun sabemos qué nome pudieron tener estos seres en dómina prerromana y menos como pudieron denominalos los antiguos pobladores de la contorna d'Avilés. Pepe Venancia referiérese a él como El Cornelu, por una de les sos característiques representativa, los sos cuernos. Cornelu, amás, ye un preciosu vocablu del bron (llingua gremial de los caldereros de Miranda, Avilés) que significa, “güe o toru”, dexando d'esta manera recuperar tamién un aprecio términu del patrimoniu llingüísticu del conceyu d'Avilés. 

Pepe Venancia lo describe como “…un mozo enmascarado que lleva unos cuernos con unos cordeles amarrados a una melena hecha con pieles de oveja que le llegaban hasta la cintura. Tenía una careta de tela con una barba muy larga hecha con los pelos de la cola de un burreño o caballo…”

Dalgunos personaxes d'esti tipu que llegaron hasta nós, son Los Zamarrones La Pola L.lena Los Sidros de Valdesoto, El Diablu de San Xuan de Villapañada, n'Asturies, Los Zarramacos de Cantabria, Los Carochos de Riofrío en Zamora, los Momotxorros del carnaval de Alsasua en Navarra y muchos otros más. 

Sicasí, nel casu de “El Cornelu”, hasta que nun s'atope información escrita, los responsables del Coleutivu Abillés, Cesar Álvarez o Víctor Raúl Pintáu Rei– Vitu-, prefieren referise al él, como “MAZCARITU TRADICIONAL”, más que como PERSONAXE DE “AGUILANDU” RURAL. Esto ye, taríamos falando a una persona amazcarada (“amazcarada o amarutada”) del Antroxu avilesín de principios del sieglu XX.