Alredor del santuariu hai, el día de la fiesta, una romería. La romería ye un vezu perinteresante y mui afitáu na sociedá asturiana. Toles romeríes asturianes tienen una forma mui asemeyada: hai una pelegrinación al santuariu y ellí, nun sitiu a poder ser llanu y afayadizu, entámase una fiesta mui variada, na que nun falta mercáu, tiendes, música y baille. Nun falten, entós, na romería asturiana les barraques onde se vende sida y, nes zones occidentales, el vinu. Hai tamién mui bien de puestos nos que se venden llambionaes y toa mena de dulces. Los comerciantes que ponen los sos tenderetes lleguen la viéspora pa que tou tea bien preparáu pal día de la celebración. Dempués de la misa y la procesión, ye cuando llega´l tiempu de la xinta, que prepararen les muyeres de la casa. Los romeros que vienen de fuera y nun tán invitaos por dalguna de les cases tiene que llevar les coses pa comer. En xintando, garrenmunchu puxu les compres, el xaréu y el baille, que dura hasta bien de nueche.

La xerarquía eclesiástica nun vía con buenos güeyos los escesos qu´a vegaes había nes romeríes y asina pue vese nes “Constituciones Synodales del Obispado de Oviedo” (Salamanca, 1786), nes que se prohíbe, con pena d´escomunión, dir a los bailles que pola nueche se faen nes romeríes y alredor de les fogueres en xeneral. Ye probable qu´influyeren nello les opiniones negatives del padre Feixóo, porque esti illustráu criticó l´ambiente desordenáu de les romerías. Sicasí, el gran pensador Melchor Gaspar de Xovellanos, otru illustráu, na so “Carta octava a Ponz” vía con simpatía les costumes de les romeríes y los sos efeutos favoratibles pal campesináu, yendo asina a la escontra de Feixóo y criticándolu porque les sos razones teníen “mala lóxica” y los sos argumentos yeren frívolos.

Yera una costume mui afitada comprar los perdones, que yeren les coses que se mercaben nos puestos de venta pa llevar como regalu a los de casa o les amistaes. También había acciones menos pacífiques, especialmente a la hora del baille, qu´en tiempos pasaos se facía a la lluz de les fogueres y cola música que salía de la gaita y del tambor, invitando asin a baillar les pieces tradicionales. Efeutivamente, nun yera raro qu´hubiera griescas y los mozos taben bien avezaos a les engarradielles. Nun había, xeneralmente, fiestes ensin pelea y por eso los mozos de los distintos llugares solíen dir con palos a baillar. Aunque nun yera frecuente qu´hubiera consecuencies tráxiques, sí había escalabraos d´un pueblu a d´otru al final del baille.

L´asistencia a les romeríes menguó muncho y les qu´agora se faen tienen un aquel bien diferente de les antigües. Güei vase a la romería en coche y la zona onde ta la fiesta tien que tener un gran aparcamientu si se quier que pueda dir la xente. Perdiérense delles formes de diversión,qu´agora tien otres espresiones, y los bailles modernos sustitúin a los tradicionales qu´agora siguen faciéndose, peor namás como actuación folclórica, aunque la verdá ye qu´estes actuaciones tienen un gran interés pola connotación identitaria qu´hai nelles.