El conceyu d’Ayande escuende ente les sos caleyes, montes y poblaciones munchos secretos. Dalgunos que, incluso, lleguen a ser lleenda. Sicasí, ún d’esos secretos qu’abelluga esti conceyu del suroccidente d’Asturies enllena de maxa les cais de la parroquia de San Salvador del Valledor, ún de los requexos del conceyu más aisllaos en toa Asturies, yá que namás dende La Puela, capital del conceyu, tárdase aproximao 1 hora en coche. El secretu meyor guardáu del Valledor y d’Ayande son Os Reises del Valledor, una costume que consiste nuna mazcarada que tresforma a los vecinos del pueblu col entamu del añu y col oxetivu de cantar, baillar y pidir l’aguilandu.
Os Reises del Valledor, asentaos de nueves nes celebraciones de la parroquia ayandesa, dexaron d’organizase dellos años, en particular, ente la década de 1960 y 2009. Sicasí, ye precisamente nesi últimu añu cuando l’asociación Conceyu de Cultura Tradicional Vezos Ástures tomó’l determín de recoyer de la tradición oral tola información sobre esta comparsa pa que nun se perdiera y que llevaba mediu sieglu ensin celebrase. A lo cabero, l’Asociación Cultural Amigos de Fonteta asumió’l testigu tentando de recrear lo que se facía de vieyo y que col pasu del tiempu quedara nel escaezu.
La comitiva d'esta tradición prestosa ta formada xeneralmente por once personaxes habituales, que van acompañaos de dalgún gaiteru, un tamboriteru y un curdionista. Estos percuerren los pueblos de Vilalaín, San Salvador y Fonteta, parando en cada casa habitada (menos naquelles que tuvieren dalgún fallecimientu esi añu) pidiendo l'aguilandu. Davezu, ye El Choqueiro el qu'encabeza'l grupu, faciendo sonar les ‘llueques’ que suel llevar colgaes pela cintura. El Choqueiro d’os Reises, que va coles llueques col envís de dar anuncia de la presencia de tola comitiva, ye una de les representaciones que los vecinos escueyen d’ente delles persones y que tien el sentíu de premiu, con muncha importancia pa los habitantes d’esta parroquia.
A esti, síguenlu los guapos y los feos («os de a roupa boa y os de a roupa ruía»), ente ellos El Militar y El Valencianu coles sos respectives Madamas, dispuestos a cantar y baillar, non ensin antes pidir permisu pa faelo diciendo «¿Cantamos o andamos?». Nel casu de que la respuesta seya «cantamos», entonen una mesma melodía que diz: «Equí venimos cuatro, vamos cantar dos, déanos l’aguilandu, señora, por Dios…». Una vegada que se canta esto, A Gocha recueye los regalos ufiertaos nun sacu, que lleva consigo pa depués compartir con tol grupu.
Mentanto, el restu de la comitiva anda faciendo trastaes per tolos llaos: El Maragatu encárgase de que naide pase ensin un taragañu de nabu y pesando na so romana los pechos de muyeres y les «partes nobles» de los homes asistentes. La Barredora dedícase a emporcar más de lo que llimpia; La Cardadora siempres ta nos sos llabores d’atopar pioyos ente’l pelo de la xente más que de cardar la llana; El Ródalo tamién ta de contino faciendo trastaes, tirando tierra, piedres, lleña apilao, travesando palos nos caminos o quitando gorros y llevantando faldes. Cuando les campanes de la ilesia de San Salvador marquen les dos de la tarde, tola comitiva xúntase frente al templu pa dar por concluyíu’l desfile y echar unos bailles depués d’una mañana bien llarga percorriendo les caleyes allandeses a la gueta del aguilandu.
D’esta manera, podemos dicir que remata una mascarada tan prestosa como la d’Os Reises del Valledor, entamada pola Asociación Cultural Amigos de Fonteta. Paga enforma la pena esfrutar d’una de les ayalgues etnográfiques del suroccidente asturianu, un territoriu que guarda ente les sos coraes una montonera d’ayalgues que ye necesario caltener.
