Bimenes, conceyu de la comarca sidrera, tien ente'l so terrén munchos planes pa realizar,magar del so pequeñu tamañu y población. Bimenes, tamién conceyu mineru anque non tan conocíu, enllena'l so mapa d'opciones culturales, d'ociu y de munchu entretenimientu. Poro, en VerAsturies, güei traémoste 3 coses que facer en Bimenes, 3 coses que faer nel conceyu de los yerbatos.
La Casa de Les Radios de Bimenes
La Casa de Les Radios atópase allugada nun edificiu vanguardista asitiáu nuna redolada paradisiaca y con vistes impresionantes. La esposición qu'alluga la Casa de Les Radios consta de dos colecciones, l'axuntada por José Alonso Onís, que según inventariu se compón de 340 pieces (gramófonos, gramoles, micrófonos, discos…) y l'axuntada pola Asociación de Vecinos de Suares, que consta de 144 receptores.
Na esposición pueden vese 156 pieces y el percorríu ta fechu de forma cronolóxica, dende los aparatos más antiguos y emblemáticos qu'espliquen la hestoria de la radio, hasta llegar a los más recién na planta cimera. La so visita namás cuesta 2€.
La Senda de los Molinos
Hebo un tiempu que los molinos qu'dornaben el paisaxe nun yeren los eólicos. Y esa tradición caltúvose en Bimenes na Sienda de los Molinos. Cinco molinos n'apenes 3 kilómetros trespórtennos a una dómina anterior y a la importancia del ríu, de les sos crecíes y del so abonu de les tierres circundantes, onde'l maíz yera la base de l'alimentación familiar. Un trayectu curtiu, d'apenes trés kilómetros en cada sentíu pa conocer unu de los conceyos de la Comarca de la Sidra.
El Palacio de Martimporra
Una de les ayalgues del aptrimoniu del conceyu de Bimenes ye'l palaciu de Martimporra, l'edificiu más importante de la zona. L'edificiu fundóse ente los sieglos XVII y XVIII por Juan de Valdivares y la so esposa Cecilia Estrada. Darréu, pertenecería al marqués de Casa Estrada. Xuntu al palaciu ta la capiya privada, del s. XVII, advocada a la Virxe del Camín. Tien namás una nave y una sacristía al llau sur, onde s'atopa'l panteón familiar. Debaxo del escudu familiar, apaez un sarcófagu nel que se llee: Esta es la casa de Estrada, fundada sobre un peñasco, más antigua que Velasco y al Rey no le debe nada.
