Cada 8 de setiembre, Asturies enllénase de festividá y les redes sociales tresverten conteníu asturianu, sobre manera imaxes de paisaxes, la famosa bandera o l'ultra conocíu himnu d'Asturies. Sicasí, ¿sabes por qué cada 8 de setiembre se celebra'l Día de Asturies? De siguío, esbillámoste un poco de la hestoria y los motivos que causen qu'esti día miles d'asturianos celebren la so identidá.
¿Cuándo entamó a celebrase'l Día d'Asturies?
Anque paeza daqué de tola vida… lo cierto ye que'l Día d'Asturies conmemórase cada 8 de setiembre solamente dende va 44 años. Esta iniciativa surdió nel momentu de la Transición y la primer vegada fíxose nun llugar históricu p'Asturies, como ye Cangues d’Onís. Curiosamente, seríen los comunistes los qu'en xunetu de 1980 propondríen al restu de partíos presentes nel Conseyu Rexonal que'l día de la santina se convertiera nesi día. La propuesta de los comunistes nun sedría recibida primeramente con entusiasmu pol restu de partíos, y ganaría más por eliminación que por seducción, al nun querer entemecer una xornada de calter políticu con una fiesta que n'Asturies tien tradicionalmente un sentíu relixosu. Sicasí, finalmente trunfó'l 8 de setiembre como'l Día d'Asturies.
¿Qué se conmemora?
El día 8 de setiembre, como yá diximos, celébrase'l día de la santina o la Virxe de Cuadonga que, según cuenta la tradición, ayudó a los cristianos dirixíos por Don Pelayo a ganar la Batalla de Cuadonga, provocando un desprendimientu de roques. Del mitu a la realidá… hai un trechu. Tanto ye asina que la conocida batalla nun foi más qu'una simple escaramuza y nun empezó nenguna Reconquista, y ye un términu erróneu que nos últimos tiempos los historiadores tán tratando de correxir. Pa considerar la conquista cristiana de la Edá Media una reconquista, habría que reinstaurar el reinu visigodu qu'esistía enantes de la esistencia d'Al-Ándalus.
25 de mayu ¿Día d'Asturies?
Dende inclusive enantes de la primer celebración del Día dAsturies, la fecha causó polémica, yá qu'otros munchos yeren partidarios d'una fecha más simbólica pal pueblu asturianu. Falamos del 25 de mayu, que fai referencia a esa fecha de 1808 nel que los asturianos se llevantaron contra los franceses nel añu 1808 y declaráronse soberanos. Si quies conocer la hestoria completa, esiste un cómic sobre ello. Na Transición, foi la asociaciación Conceyu Bable quien más fixo por reivindicar el 25 de mayu como'l día de celebración. Anguaño, anque nun ye'l día de Asturies, nesti día celébrase'l día de la bandera, colo que dambes feches son importantes pa la sociedá asturiana.
