El conceyu más pequeñu d’Asturies, Noreña, ye una tierra próspera abellugada nel corazón de Siero, mui famosa poles sos industries cárniques y chacineres, que la faen acreedora d'una gastronomía única y d'escelente calidá, venceyada especialmente a los derivaos del gochu. Amás, esti animal ye respetáu ya idolatráu nesti conceyu hasta tal puntu que cunta col so propiu y graciosu monumentu nel corazón de la villa condal, que ye como se conoz a la capital del conceyu. Les fiestes gastronómiques tienen como base, por exemplu, los callos -que constitúi’l gran referente gastronómicu d'esta villa-, asina como l’adobu, la fabada o'l sabadiegu, embutíu típicu noreñense que cunta inclusive cola so propia Orde. Paga la pena tamién dar un paséu pel cascu históricu de la villa, que nos tresllada a un pasáu noble de palacios y cases principales. Que’l so tamañu nun t’engañe, Noreña escuende munches ayalgues, como estes:

La capiya del Ecce-Homo

La primer capiya, construyida nel añu 1665 y allugada na zona conocida como Castañéu de La Soledá, foi una donación del noreñense Lucas Muñiz. Tres la so destrucción nel añu 1901 por una quema, foi construyida de nuevu nel so allugamientu actual en 1903, según el diseñu orixinal de Luís Bellido. En 1953 foi remocicada por Enrique Rodríguez Bustelo, siguiendo'l modelu de les capiyes rurales asturianes. Ye un edificiu cubiertu con bóveda de cañón y un pórticu na so fachada principal. Nel so interior el retablu barrocu, adquiríu en 1948, vien de la ilesia de San Juan de Tamariz de Campos (Valladolid). Nél asitióse la imaxe del “Ecce-Homo” obra del escultor sevillanu Gregorio Galán del Amo al igual que'l tronu de madera dorao de Flandes. El conxuntu foi adquiríu en 1955 pola Confrería de Xesús Nazarenu por aciu suscripción popular.

Esposición de Zapateros na Torre del Reló

La Torre del Reló allúgase a media fastera de la llomba d'El Rebollín, nuna posición privilexada por que'l so reló se viere dende cualquier puntu de la villa. Ye una construcción del postreru cuartu del sieglu XVII tal como lo constaten documentos del Arquivu Municipal de Noreña. Tien planta cuadrada y trés pisos, superando los 13 metros d'altor. Les sos muries, que'l so grosor mengua col altor, son de mampostería con sillares nes esquines. Remata la cubierta, a cuatro agües, una estructura de fierru que soporta la campana del reló y una veleta. Sirvía pa llamar a los vecinos a xunta, de cárcel, de reló públicu, etc. El reló actual, del añu 1864, ye obra de José Martínez, reloxeru del Conceyu de Bilbo. El so bon estáu de caltenimientu débese al llabor de restauración del reloxeru José Fernández Iglesias que dende l'añu 1947 s'encarga del so caltenimientu. Na actualidá'l so fíu Victor Fernández Álvarez encárgase del so caltenimientu. Na actualidá alluga la Esposición Permanente de Zapateros, amuesa de la importancia d'esti gremiu na hestoria de Noreña.

El quioscu de la música

Nel añu 1891 créase en Noreña la Banda de Música Municipal, y al añu siguiente, Juan Miguel de la Guardia va proyectar el Quioscu de la Música que va ser construyíu por Arturo Bertrand. Al igual que fixo nel Quioscu del parque de San Francisco d'Uviéu, el so arquitectu desenvolvió una planta octogonal con estructura de fierro y madera, cúpula d'escames de cinc y un remate en forma d'aguya. La cuidada ornamentación combina roleos, motivos florales y musicales.