Con tantos conceyos como hai n'Asturies, a vegaes resulta difícil escoyer el llugar al que fuxir pa desconectar o, simplemente, pa conocer nuevos requexos. Poro, güei, en VerAsturies, traémosvos cinco planes que podéis facer nel conceyu de Cabranes, encuadráu dientro de la Comarca de la Sidra.

Conoz el muséu de la Escuela Rural de Cabranes

El conceyu de Cabranes ye pequenu y con poca población. Sicasí… ¡nun ye nenguna torga pa que nun haya cultura! Na localidá de Viñón tienen el Muséu de la Escuela Rural. L'edificiu qu'ocupa'l muséu foi diseñáu pol arquiteutu provincial Javier Aguirre Iturralde ya inauguráu en 1908 como escuela unitaria. Tenía capacidá pa 120 alumnos y nel pisu cimeru atopábense dos viviendes pa los maestros. El muséu foi abiertu al públicu n'agostu de 2002 y, la que foi la primer escuela construyida nel conceyu, alluga agora una gran colección de moblame, útiles y material escolar entendíu ente 1911 y 1970.

Esti ye'l so horariu, destacando la gratuidá de la entrada los miércoles:

  • Miércoles, xueves y domingu de 11:00 a 14:00.
  • Vienres y sábadu de11:00 a 14:00  y de 17:00 a 19:00.

Visita Torazu, el pueblu exemplar de Cabranes

Esti pequeñu y encantador pueblu asturianu llevóse'l premiu al Pueblu Exemplar nel añu 2008 y ta dientro de los Pueblos más guapos d'España. Con un entramáu que guarda a la perfección l'arquitectura tradicional asturiana, vas quedar namoráu d'esti llugar que cunta tan solo con 100 habitantes.

Vive'l Festival del Arroz con Lleche

El Festival del Arroz con Lleche, que se celebra cada añu en Santolaya por mor del impagable llabor de l’asociación cultural L’Orbayu San Francisco. Amás, gracies a la Confradería del Arroz con Lleche, otórgase’l títulu de «Gran Maestre del Arroz con Lleche» a aquella persona que, pola so edá, algamó un mayor númberu de premios llograos n’ediciones anteriores y a la que’l conceyu fai una reconocencia, nel marcu del actu institucional del festival. Ensin dulda, un bon momentu pa visitar Cabranes.

Esfruta del so patrimoniu hestóricu

Cabranes abelluga dellos edificios históricos de calter relixosu y con una importancia arquitectónica grande. Na so mayoría, son construcciones modernes, del sieglu XVI al XVIII, como la capiella de Santa Ana (Madiéu), el santuariu de la Virxe del Carme (Arboleya) o la iglesia de San Martín (Torazu), ente munches otres. Sicasí, destaquen dos ilesies, la de Graméu, fundada nel sieglu IX y restaurada nel sieglu XIX y la de Viñón, ilesia románica del sieglu XII con elementos prerrománicos del sieglu IX y que ta catalogada como Bien d’Interés Cultural. 

Percuerre la so naturaleza faciendo senderismu

Conocer el conceyu al traviés de la so naturaleza ye un plan fantásticu pa los más aventureros. Facelo nun ye nada difícil y son delles les rutes que puedes facer a lo llargo del tol territoriu. El propiu ayuntamientu habilitó na so web un espaciu coles rutes disponibles que puedes consultar equí. equí.