Arantxa Margolles estrénase como collaboradora de VerAsturies.com, con una sección selmanal d’efemérides asturianes
Cada selmana Arantxa Margolles va trayer a los y les llectores de VerAsturies.com un artículu con una efeméride asturiana. La hestoriadora y arqueóloga xixonesa va sumase asina al equipu de redacción de la plataforma Ver Asturies. Cada selmana va percorrer les hemeroteques asturianes a la gueta de momentos destacaos o chocantes de la hestoria d’Asturies, que va llevar a los llectores col so habitual estilu, rigurosu y al mesmu tiempu entreteníu.
Como ye vezu en VerAsturies.com, los artículos podrán atopase mesmo n’asturianu qu’en castellán, y acompañaos d’imáxenes del momentu, buscando siguir la llinia visual de la plataforma. Amás, dalgunos artículos van apaecer tamién na versión impresa en papel de VerAsturies.com, la nuesa revista Viaxast.
Arantxa Margolles (Xixón, 1982) ye hestoriadora pola Universidá d'Uviéu y arqueóloga pola Universidá Autónoma de Madrid. Collaboradora habitual d'El Comercio, TPA, onde presentó Histories y Misterios, RPA o PlayPresta, onde presenta Cróniques ocultesta especializada na divulgación de la hestoria, tamién con visites guiaes como la esitosa Xixón mete mieu, dientro del ciclu XixónTours.
Lluis Fanjul, director de VerAsturies.com, de la que yá son collaboradores habituales Beatriz Rato, Inaciu Galán o Vero Suari, ente otros autores, mostróse bien contentu cola incorporación de Margolles: “Con ella sumamos a una muyer que ye referencia na investigación hestórica y sobre manera na divulgación, que ye la parte que más nos interesa potenciar dende VerAsturies.com, yá que ye esi, dar a conocer la hestoria d’Asturies, de forma amena y rigurosa, unu de los principales oxetivos de la plataforma”.
