El filandón, tradición asturiana 

Anque, anguaño, yá nun se faiga de manera oficial y lo que podemos ver con representaciones de grupos folklóricos y de caltenimientu de la tradición, el filandón yera parte del día tres día tres l'empiezu de la seronda y, sobre manera, nos fríos díes d'iviernu. En dellos llugares tamién se llama fila o polavila. Na zona occidental ye común el nome de filazón. Seya col nome que seya, esta tradición asturiana merez ser bien recordada.

Yeren xuntes de muyeres en casa de dalgún vecín pa filar alredor de la lumbre, realizábense nes tarde ivernices. Col pasu del tiempu fueron sumándose-y homes y mozos al trabayu. Los primeros, dedicábemos a cuntar hestories. Per otra parte, los mozos diben cortexar a les moces. Pa pagar el gastu de lluz, les muyeres filaben un día a la selmana pal vecín que ponía la casa.

Como n'otres celebraciones, a los mozos dexábase-yos la entrada al filandón pa cortexar, pero con control, a la vista. Cotilleando taben les madres y les güeles, mirando a ver quién taba charrando coles neñes. Y como n'otres ocasiones, tamién taba intervención de los guardianes de la moral. Párrocos, obispos y autoridaes civiles y eclesiástiques que publicaben bandos y sermones alvirtiendo de lo peligroses que yeren estes xuntes y de los sos «peligros».

Los cantares del filandón

Como ye habitual nos trabayos, el filandón tamién tenía cantares populares que se cantaben mientres se desenvolvía la xera:

Texedora, el to telar
d’oru tien la llanzadera
quien la pudiere robar
y al telar y a ti con ella

Cola rueca nuna mano
y el fusu na faltriquera
voi pa casa la vecina
a marmuar de vida ayena