«Cuando quixi amestar a la llibrería cuentos pa los mios fíos sobre eses biografíes femenines dime cuenta de que los nomes siempre se repetíen. Y ensin tener referentes nel nuestru entornu cercanu, la llucha pola igualdá semeyaba un rellatu únicu qu'en tolos llaos asocedió igual o que, a lo menos, asocedió mui lloñe d'au vivimos. Y yo dende pequeña vivo en Xixón». Asina definió Alicia Álvarez "Asturianes", el llibru que dio llugar a la esposición de la qu'agora falamos.
La esposición Asturianes puede vese nel Centru de Cultura Antiguu Institutu de Xixón hasta'l próximu 29 de xineru nel horariu habitual del edificiu y ye una iniciativa de la Oficina de la Normalización Llingüística de Xixón.
Averámonos asina a la figura de venti muyeres y colectivos inspiradores d’Asturies: Aida Lafuente, Margarita Salas, Corín Tellado, Les Cigarreres, María Luisa García, Urraca l’Asturiana, Les Comadres, Muyeres o Xosefa Xovellanos son dalgunos de los nomes presentes nesti llibru qu’axunta muyeres de toles époques y perfiles: revolucionaries, escritores, científiques, deportistes, pintores, trabayadores, cocineres, polítiques y por supuesto, músiques.
12 de xineru. Charra: Tertulia feminista Les Comadres.
15 de xineru. Charra: Creando dende los márxenes: Julia Alcalde y el bodegón.
18 de xineru. Taller: frutes, flores y fanzines: (de)construyendo bodegones con Julia Alcayde.
23 de xineru. Conciertu: Alicia y Mar Álvarez.
25 de xineru. Charra: Urraca, el misteriu de la bastarda que quixo ser reina d’Asturies.
