La Xamoca cunta 1283 metros d'altitú sobre'l nivel del mar y delimita los conceyos de Llaviana y Sobrescobiu. Atópase asitiada na enllargada sierra que va dende'l Picu Abedurial hasta Peña Mayor.
Son dellos los conceyos polos que puede aportase a La Xamoca. Pol conceyu de Piloña, partiendo del pueblu de La Marea, al traviés del Camín del Coballón y El Arrudu. Nel conceyu de Casu, cruciando los senderos que parten de Collá Arniciu. Pol conceyu de Llaviana, saliendo del pueblu d'El Condao. Y pol conceyu de Sobrescobiu, al traviés de Rusecu y l'aldega de Campiellos. Esti postreru va ser el que vamos rellatar.
Partiendo de Rusecu, vamos dir hasta Campiellos, onde se dexa'l vehículu. Equí vamos tomar un camín que llega a la collada Saús. Un pocu antes dexaríamos tras la mayada de Llagos, onde hai una pequena llaguna. Bordiando la peña y xubiendo adulces vamos llegar en menos d'una hora al cume de La Xamoca.
La Xamoca ta arrodiada de montes, lo mesmo que de picos y valles, onde pueden vese venaos, corzos, robecos, jabalíes, raposos… Tamién abonden los melandros, turones, papalbes, foines, etc. Según aves rapaces.
Dende la peña vamos poder ver tol valle del Nalón al sur y al fondu les foces del Llaímo, surcaes pel ríu Alba. Tamién puede contemplase al sur, el embalse de Rusecu. Al oeste tenemos toles tierres de Llaviana. Pel este la collada Lechugueru y montes casinos. Y al norte, el cordal de Peña Mayor, col Trigueiru o Breza en primer términu. Según el Arrudu, cerca del cual pasa'l senderu que vien de La Marea, por Ponte Miera y mayaes de La Infiesta y Tayones.
El descensu podemos faelo pol mesmu camín d'ida. Anque si ye posible tamién podemos siguir la ruta hasta El Condao, tomando'l camín na collada Saús, para baxar pola mayada de La Calencia y La L'Aldea. Hai xente que prefier facer una llarga caminada y sigue pol cordal de Peña Mayor hasta la Faya los Llobos o Melendreros.
