Ponga, declaráu Parque Natural y Reserva de la Biosfera, ye un paraísu pal turismu activu. A la gran bayura d’opciones pa facer senderismu, en llugares como’l fayedal de Peloño, ha sumase la posibilidá d'esfrutar les agües braves y practicar rafting o barranquismu nos cañones de Vibuli y Carangres. Si lo que preferimos ye l'arte, el patrimoniu y la etnografía, siempres queda la opción de visitar l'Ecomuséu de Beleñu dedicáu a la madera y allugáu na capital, San Xuan de Beleñu, dir a les ermites de Ventaniella o Arcenorio, al palaciu de Sobrefoz, al Señoriu de Cazu o a les aldegues de Tarañes o Viegu. Ponga atropa tolo que necesites pa esfrutar del territoriu.
Escobiu de Los Beyos
El ríu Seya parte en dos el terrén caliar formando una espectacular y estrechu gargüelu conocíu como l'escobiu de los Beyos. Asina, l'escobiu trescurre mientres 12 quilómetros colos pueblos asitiaos na marxe izquierda del Seya, que se denominen pueblos beyuscos. Con esi nome denomínase tamién a los sos horros, esto ye, horros beyuscos. Son poblaciones de localización complicada pero de gran guapura y con característiques arquitectóniques mesmes como los horros, construyíos col teyáu a dos agües en cuenta de a cuatro, como suelen ser nel restu d'Asturies.
Viesca de Peloñu
Con una estensión d'unos 15 quilómetros cuadraos, ye consideráu unu de los fayedales meyor calteníos n'España anguaño. Anque la faya ye la especie predominante, tamién podemos atopar bonos exemplares de carbayos o xardones. Nes zones altes abonda'l enebru rastreru y l'arándanu ente otres especies. Asina, el Monte de Peloñu, como'l de La Salguerosa o Ventaniella, acabaron convirtiéndose fundamentalmente en fayedales, con amueses notables nel so interior, como'l Roblón de Los Bustiellos o l'acebal de Les Llampes, d'otres formaciones montiegues. El frondosu monte y los fondos valles conformen l'hábitat ideal pa la fauna autóctono como xabariles, corzos, venaos y robecos. Destaca la presencia esporádica del osu pardu y aves en peligru d'estinción como'l gallu montés, el pitu medianu y el pitu negru.
Casielles
Pa los amantes del ciclismu, na carretera que xube hasta'l desconocíu pueblu de Casielles van atopar el Alpe d’Huez asturianu. Son 23 curves de ferradura les que nos lleven al cielu de Ponga. Casielles ye unu de los pueblos beyuscos qu'entá permanez habitáu y que paga la pena visitar, yá seya en bicicleta, en coche o caminando.
