Taramundi ye unu de los destinos más singulares del occidente asturianu, ideal pa quien busque naturaleza, tranquilidá y tradición. Esti conceyu forma parte de la Comarca Oscos-Eo, Reserva de la Biosfera, y destaca pol so paisaxe de verdes montes, valles y ríos cristalinos. Ye un referente del turismu rural n'España, famosu pola so hestoria venceyada a la artesanía del fierru y los sos molinos hidráulicos. Visitar Taramundi ye adientrase nun mundu d'oficios antiguos, cultura viva y guapura natural.
Muséu de Mazonovo
Bien pronto a Taramundi, ta valoráu como'l meyor muséu d'Asturies por Tripadvisor, y con razón. Nél ta la mayor colección de molinos hidráulicos d'España, con más de 19 pieces reales y reconstrucciones de molinos de tol mundu y de distintes dómines de la hestoria, amás d'inxenios tradicionales asturianos. Esta esposición enséñate como se molía'l trigu utilizando la fuerza del agua. Ye ideal pa dir con neños yá que ye interactiva, y en delles partes del percorríu puedes ser tu mesmu'l que ponga en marcha'l mecanismu hidráulicu o emplegar molinos manuales pa moler granu.
El muséu zarra mientres la mayor parte d'avientu, xineru y febreru. El restu del añu podemos atopalo abiertu de 10:30 a 17:30 sacante xunetu, agostu y setiembre qu'abre hasta les 18:30.
Muséu de la cuchillería
Esti muséu ta a menos de 1 kilómetru de Taramundi, nuna aldega llamada Pardiñas na que na actualidá a penes viven 6 persones. Ta formáu por un complexu de 3 edificios, caún de los cualos cumple una función. Nel interior del más alloñáu atópase un taller de navayes real nel que trabaya Juan Carlos Quintana López. Él ye la séptima xeneración d'una familia de ferreiros y navayeros de Taramundi. Ellí ellabora cuchiellos y navayes de forma artesanal en vivu. Nel edificiu principal podemos ver una esposición sobre la ferrería en Taramundi y en rexones cercanes d'alredor d'Asturies. Ellí esplícase la hestoria de la tradición ferrera d'esti conceyu, el procesu d'ellaboración de les navayes y hai una colección perteneciente a dellos ferreros de la zona. Nel edificiu que s'atopa frente a esti, ta la xoya viva del muséu: el taller tradicional de cuchillería nel que cada media hora realícense demostraciones en vivu de como yera forxar una navaya va 100 años. Nel xardín puede vese tamién la navaya más grande del mundu, de 7,20 metros de llargu y 1.600 quilos de pesu.
Quesería Eo leche
Un poco primero de llegar al muséu de la cuchillería atopámonos con esta fábrica tradicional de quesos a 400 metros del centru de la villa de Taramundi. Produz una montonera de variedaes de quesos como maduru, oreáu, azul, de cabra, y de nuez y ablana, amás d'otros productos, como'l requesón.
Equí'l visitante puede conocer tol procesu de fabricación del quesu de primer mano: el tratamientu del lleche, el so cuayamientu pa que pase d'un estáu líquidu a sólidu, corte y desueráu, moldiáu pa da-y forma al quesu, prensáu, saláu y maduración. Caúna d'estes etapa ye crucial pa determinar les característiques finales del quesu.
Mientres tol añu les visites faense de llunes a vienres de 9:00-17:00 h, sacante xunetu y agostu, meses nos que podemos atopar el muséu abiertu de 9:00-20:00 h per selmana y sábados de 11:00 a 14:00 h.
Aldega d'Os Teixois
Nel corazón del conceyu, atópase Os Teixois, un conxuntu etnográficu declaráu Bien d'Interés Cultural que dexa adientrase na vida rural tradicional asturiana. Esta aldega caltien un pervalible conxuntu d'inxenios hidráulicos que funcionaben gracies al agua del regueru cercanu, como un mazu, una rueda d'afilar, un molín, una pequena central eléctrica y un batán.
Luis, el guía que nació nesta mesma población y aprendió a usalos toos ellos dende la so niñez, esplícate de primer mano cómo esta comunidá aprovechaba la fuerza del agua pa facilitar xeres cotidianes y ganase un porvenir. Amás del valor técnicu, Os Teixois ufierta una redolada natural y arquitectónica única, con construcciones de piedra y madera típica de la zona. La visita dexa entender de forma práctica la manera de vida de dómines pasaes y la estrecha relación del ser humanu cola so redolada rural.
Mientres el branu realicen visites dende les 11:00 de la mañana hasta les 19:00 de la tarde.
