Poques coses pueden facer la nuesa vida más amena y dulce qu'escuchar una bona hestoria. Yá seya al traviés de la tele, el cine, la radio, un llibru o'l teatru, el ser humanu lleva somorguiándose na ficción dende los tiempos de los griegos clásicos, escaeciendo tolos males que se-y vienen o se-y pueden venir enriba. De sópitu, la nuesa mayor preocupación nun ye la hipoteca, nin esi informe que tienes qu'apurrir nel trabayu, o si tas en paru, nin siquier el malditu andanciu. De sópitu t'esmolez que'l protagonista atope l'amor, o consiga esa ayalga escondida, o simplemente, que se salga cola suya nesa travesura tan graciosa que ta preparando. Y esa ye la maxa cola que la ficción llena la nuesa vida. El protagonista d'esti artículu lleva tola vida cuntándonos les hestories más gracioses y emotives que pudimos oyer nes últimes décades: Tomás (Tom) Fernández.

Tom nació n'una pequena aldega d'Uviéu en 1971. Dende bien pequeñu interesóse pola lliteratura y les hestories y con pocu más de venti años empezó la so andadura pelos medios audiovisuales. A mediaos de los años 90 empezó a escribir y dirixir curtiumetraxes de forma amateur, sofitáu pola Conseyería de Cultura del Principáu d'Asturies. Les sos ganes y dedicación a la de cuntar hestories acabaron dando los sos frutos col so curtiumetraxe Los huracanes, el surf y los Sioux, que ganó'l premiu al meyor curtiumetraxe nel concursu Art. Nalón de 1997.

Xusto un añu dempués la so vida daría un vuelcu al fichar pola productora Globomedia, na qu'entró a formar parte del equipu de guionistes de 7 Vidas (1999). Tratábase d'una sitcom que cuntaba los desvaríos d'un grupu de mozos que vivíen nel centru de Madrid. La serie resultó revolucionaria pola so forma de grabar y el so tempo al estilu americanu. Resultó un trampolín pa actores que güei tienen un gran prestixu como Blanca Portillo, Carmen Machi, Paz Vega, Gonzalo de Castro o Javier Cámara. Foi precisamente con estos dos últimos con quien entabló mayor amistá.

En 2001 el so viaxe cambió'l camín, fichando esta vegada pola productora QüidTV. Ende collaboró como guionista y Coproductor executivu en delles series de televisión como A medias, protagonizada por Nancho Novo, Iñaki Miramón, Bárbara Goenaga, Marian Álvarez y María José Alfonso.

Nun diba ser hasta l'añu 2004 que Tom Fernández estrenaríase como director de forma profesional, col curtiumetraxe El Pozu. Tratase d'una hestoria ambientada na gran represión franquista n'Asturies, na que Lalo, un militante socialista, ye deteníu pola guardia civil  y entrugáu a punta de pistola frente a un pozu, a piques de ser asesináu. Como interés, como vemos nel títulu, El Pozu cuenta con dellos diálogos escritos n'asturianu. Amás, esti curtiumetraxe protagonizólu Maxi Rodríguez, otru asturianu que tamién foi guionista de 7 Vidas.

Nun tardó'l destín en volve-y a poner nel camín a la popular serie que-y vio crecer como guionista. Y ye qu'en 2008 participaría como guionista en 7 ΖΩΕΣ, la versión griega de 7 Vidas. Anque, eso sí, correría peor suerte que la so homóloga española (namás cuntó con siete episodios).

Y ye que la so vida paez amestada al númberu 7. Foi precisamente nel añu 2007 cuando dio'l gran saltu como director a la gran pantalla. Esi añu dirixó y escribió la que para munchos ye la so meyor obra: La torre de Suso, na que se realcontró colos sos vieyos amigos Javier Cámara y Gonzalo de Castro. Amás trabayó tamién con Malena Alterio, Emlio Gutiérrez Caba y José Luis Alcobendas. Una hestoria que se centraba na cuenca minera d'Asturies, cuntando la hestoria de Suplo, un asturianu qu'emigró a Arxentina y que vuelve a Asturies pal funeral del so amigu Suso. Ye ende onde se realcuentra con vieyos amigos, amores, paisaxes y sentimientos.  La película bien-y valió trés nominaciones a los premios Goya de 2008, a destacar la de meyor director novel a Tom Fernández.

Unos años dempués, en 2011, repitió fórmula con Para qué sirve un oso, tamién protagonizada por Javier Cámara, Gonzalo de Castro y el paisaxe asturianu. Esta vegada la película centrabase na sienda del osu. A destacar nel repartu, una magnífica Gerardine Chaplin.

Nos últimos años, Tom volvió trabayar con Javier Cámara como guionista na serie Vota a Juan, amás de tar involucráu en dellos proyectos de televisión.

Y ye que cuntar hestories ye peradictivo, ¿hai dalgo más prestoso que cuntar hestories?