Los díes 1,2 y 3 de setiembre vuelve CometCon a la Recintu Ferial Luis Adaro de Xixón. La feria, que celebra yá la so vixésimoprimer edición, siendo la más veterana dientro del so sector en Asturies, caltien el so gran apueste pola dinamización cultural, social y económica de Xixón.

Un añu más va cuntar colos sos yá clásicos torneos de e-Sports, competiciones de videoconsola y concursos d'ámbitu nacional como'l Cosplay o'l CometTalent. Estos concursos cunten con decenes de participantes provenientes de toes partes d'España.

Pa la edición de 2023 amás Cometcon va cuntar por primer y única vegada n'España con un caza “pilotable” X-Wing escala 1:1. Una pieza de colección del más altu nivel que dempués de pasar por Dubái, Francia y Alemaña aterriza n'Asturies. Los asistentes van poder xubise y pilotala con gafes de realidá virtual.

Otru imprescindible de la CometCon son los sos invitaos. Pa la presente edición, Cometcon sigue desvelando cada selmana nuevos invitaos na so web www.cometcon.org. Anguaño los anunciaos son: Palacios64, Eric, Linguriosa, Garuna Effect, ShenronZ y SAeNcSa sumando más de 15 convidaos y convidaes en total.

Per otru llau, CometCon sigue calteniendo una bona salú, con más de 160 puestos comerciales y artesanales. Esto dexa una de les ufiertes más variaes de la ciudá, pudiendo atopar tou tipu de coleccionables, dende llaveros personalizaos hasta videoxuegos reto. En total, espérase axuntar a más de 600 persones trabayando na feria y un total de 24.000 asistentes.

Amás, va caltener los más de 18.000m2 d'actividaes, cuntando con ufierta infantil, esgrima, jugger, airsoft, simuladores de conducción, y más de 100 equipos ente PCs y videoconsoles. Un auténticu esplegue de medios pa la ciudá.

Sicasí, la guinda del pastel son les diverses actividaes que se van dir desenvolviendo mientres la fin de selmana. Tecnoloxía, talleres lliterarios, pintáu de miniatures y talleres infantiles… son munches les actividaes que van tener llugar na CometCon, polo que difícil va ser escoyer ente la gran variedá de más de 150 actividaes programaes, disponibles na so web y redes sociales.

Finalmente, en declaraciones del so director Héctor Lasheras, «CometCon vieno p'allargar el branu xixonés a setiembre con una guinda, como ye CometCon, que pon broche a un pastel cultural que dinamiza la ciudá mientres tol branu”.

CometCon ye posible gracies al sofitu de Xixón Divertia, Impulsa, Xixón Mocedá, Principáu d'Asturies, Ministeriu de Cultura, CMPA, Carné Nueva, PCbox, Nimby y Inteba, ente otros. Solo queda un mes pa qu'empiece la Cometcon 2023, asina que nun esperes más y compra yá la to entrada equí. ¡Disfruta de la Cometcon!