Entrevista a Ines Paz

Ines Paz Lemaitre (Xixon, 1980) ye una reportera y presentadora asturiana. A lo llargo de la so trayectoria, trabayo en programes como La Mañana de la 1, Viajeros Cuatro, Liarla Pardo y, amas, foi la vocera española na LVIII Edicion del Festival del Cantar d’Eurovision. Anguaño, ye la presentadora de La Radio es Mia.

**Un llugar pa perdete una fin de selmana:** Si ye branu, la costa d’occidente. Pasar el dia na sablera de Penarronda y l’atapecer n’A Veiga cola Ria de frente. Si ya nun fai tiempu de playa, cualesquier pueblu de monte onde puea arrendar una casa rural con chimenea. Ruta de dia, mantina, xuegu de mesa y chimenea de nueche. Si ye en Ponga, meyor que meyor. Fui ya munches vegaes y nun canso.

**Un llugar pa vivir:** Xixon, que ye onde vivo. Tengo la suerte de poder tornar a la mio ciudá dempues d’años viviendo n’otres ciudaes, principalmente Madrid. Xixon reúne tolo que-y pido a la vida: la mar «a tiru piedra» de casa, pa bañame o a lo menos pa vela a diario. Muncha actividá cultural y el tamañu perfectu pa percorrela a pie. Y la familia y amigos, claro.

**Un platu:** La fabada de mio ma. Son pallabres mayores.

**Un postre:** Los frixuelos que fai mio pa. Y la tarta de mazana, que-y copie la receta y salme tamien mui rica, pero colos frixuelos… por mas que lo intente, nun consigo’l puntu qu’el-y da, failos finisimos.

**Una sablera pa pasar el dia:** Si he d’escoyer una playa… cuanto menos accesible y mas virxe, meyor. D’antiguo diriate la de Torimbia, que yera una de les mios preferíes, pero va cuantaya que nun voi, convirtiose cuasi nun parque d’atracciones. Fuera de temporada, meyor.

**Un pueblin que nun podemos dexar de ver:** Esti branu conoci un mui pequenu que m’encanto. Ta en Cabrales, llamase La Molina. Ye onde empieza una ruta mui facil pa facer con neños, les foces del riu Casaño. Les vistes dende’l pueblu son espectaculares.

**Un chigre pa tomar unos culinos:** El que mas me prestaba en Xixon, en La Calzada, desaparecio como munchos otros chigres. De los que queden, cualesquier chigre-tienda en dalgun pueblu pequenu. Esti branu tuvi nun del pueblu de Pandiellu, en Cabrales, que yera una maraviya.

**Un parque natural pa visitar:** El de Somiedu. Pol entornu natural, les brañes y los pueblos. Visita obligada a Cauneu, a onde la FreeHouse que monto’l mio amigu Daniel Suarez dinamiza muncho l’entornu respetando «lo de tola vida». De la so mano conoci los meyores requexos de Somiedu, namas hai que tener ganes de perdese per dalgun camin y salise un poco de les rutes mas tradicionales.

**Una fiesta a la que nun faltar:** Cualesquier romeria o fiesta de prau. Sedra por fiestes n’Asturies.

**Un museu pa recomendar:** El Museu del Pueblu d’Asturies en Xixon. Y n’especial, la bolera. Tuvi la suerte de grabar elli va dellos años, cuando trabayaba en Television Local de Xixon, TLG, y foi mui guapo. Venien paisanos a enseñanos colos bolos y menudu ritual nuna bolera tan emblematica.

**Un momentu de la hestoria d’Asturies que te prestaria vivir:** Nun soi señardosa, quedo col actual. Lo pasao pue vese con romanticismu, que lu tien, pero creo que na mio xeneracion tuvimoslo muncho mas facil o menos duro que nes pasaes, asina que meyor nun tentar el destín.

**Una pallabra n’asturianu que te preste:** Chiscar prestame mucho. Que me chisquen non tanto.

**Una tradicion que nun pue perdese:** Echar la sidra. Cuando veo a dalgun turista tomar la sidra como si fuera vinu… non siempre consigo nun llevantame ya «instruyilu». Y con echar la sidra nun me refiero a los tapones que se ponen agora, echo de menos llegar a un chigre y que lo normal seya que t’escancien o escanciar.

**Una espresion n’asturianu que te preste:** «Fai un cutu qu’escarabaya’l pelleyu y pinga’l mocu». La mio hermana y yo deciemosla muncho de neñes.