La televisión pública asturiana (TPA) va estrenar güei, xueves 8 d’ochobre, a les 22:22 la tercer temporada del programa dedicáu a la cultura sidrera, Mundu Sidreru, presentáu pol periodista Inaciu Galán.10 capítulos que van emitise a lo llargo la seronda, dempués de que’l confinamientu evitara la posibilidá de poder siguir grabando na primavera.
El programa, que cunta cola colaboración de la DOP Sidra d’Asturies vuelve a percorrer toles facetes de la Sidra d’Asturies, visitando llagares, chigres, eventos y falando coles persones que más saben de la bebida insignia de la cultura asturiana, nun momento difícil poles circunstancies, pero que la cultura sidrera asturiana ta sabiendo sacar alantre.
En esta temporada, y como una de les novedades más importantes, les recetes sidreres les harán cocineres del Club de les Guisanderes d’Asturies, que conocen a fondo les posibilidaes de la Sidra d’Asturies combinada colos productos asturianos más variaos.
Como ye vezu en Mundu Sidreru, cada programa va abrise con una entrevista con figures relevantes de la sociedá asturiana, alredor d’una botella y echando unos culinos n’espacios impactantes del paisaxe d’Asturies que se convierten en platós del programa colos yá celebres sillones oreyeros del espaciu, pelos que pasaron artistes como Victor Manuel, María Cotiello, Hevia, Marisa Valle Roso, Vicente Díaz o Rodrigo Cuevas, ente otros.
Nesta temporada ta prevista la presencia nestes entrevistes de figures como’l presentador y actor Pedro Durán o la cantante Silvia Quesada, ente otres sorpreses. L’espaciu da-yos amás un mayor protagonismu a los consumidores finales, con delles charres informales na sección “Sidreros auténticos/Sidreres autentiques”, onde van pasar pel progrema perfiles mui estremaos que tienen en común l’amor pola sidra y pola autenticidá que da la etiquetina de la DOP.
Mundu Sidreru va volver a llevar a los y les telespectadores información sobre la bayurosa cultura sidrera y l’activu mundo industrial, d’ociu y gastronomía que xira alredor de la Sidra d’Asturies.
