Les Foces del Raigusu, una ruta espectacular

El branu ye momentu de pasar munchu tiempu fouera de casa. Yá seya folgando, d’una manera sele o con rutes, conocer Asturies ye una bona manera de pasar estos meses. Ye por eso que güei en VerAsturies te traemos la ruta de Les Foces del Raigusu, con un percorríu espectacular nel conceyu de Llaviana.

Un percorríu que ye delicia pa la vista

El percorríu d’esta ruta ye espectacular a la vista. Con una distancia de nueve kilómetros, la ruta empieza en L’Acebal y trescurre per Les Mestres, Foz de Covellayo, La Uxona, Campa Los Collaos y Covellayo hasta volver al puntu inicial.

L’itinerariu empieza per una pista qu’apaez en travesando’l pueblu y conduznos a la ponte de Tiraña. Siguimos la caleya arrodiada d’arbolea y paralela al ríu Ribota con dirección al pueblu de La Fomermeya. Antes de llegar ehí, en Les Mestres, la pista encrúciase. Tomando’l ramal de la derecha adentrámonos nuna serie de montes al llau del ríu, llegando a la Foz de Covellayo. Siguiendo ese mesmu camín, va llegar un momentu nel que veamos un encruz de caminos. Tamos énte La Uxona. Pola derecha vamos dexar el camín que vien de Los Tornos.

Vamos siguir al llau del ríu hasta Covellayo y vamos siguir hasta’l llugar llamáu El Bayu. Equí, la pista va ganando altor y pasa por El Cabañón, La Braña, La Xella y Corgallones.

Tres un llargu ascensu con unes estupendes vistes del percorríu llegar a la Campa los Collaos, dende onde hai unes amplies panorámiques de too el valle del Raigusu, Peña Mexa, Peña Negra, el valle del ríu Cañaínes y el cordal que dixebra Llaviana de Sobrescobiu, con trés picos que coronen el paisaxe: El Corvellusu, El Cogollu y el Guanalón.

Una vegada coronada la ruta, descenderemos por la pista unos metros hasta que podamos ver a una campera, escontra onde iremos. Dende ellí, seguiremos un camín que va a parar a unas construcciones abandonaes hasta el llugar de Covellayo. Una vegada equí, únicamente ha de seguirse el percorríu a la inversa hasta L’Acebal.

¿Cómo llegar a les Foces del Raigusu?

Dende la villa de La Pola Llaviana l’accesu ye bien cenciellu. L’accesu faise pola carretera local LV-5, que sale del AS-17 en La Ponte d’Arcu. Ende, vas llegar a la localidá de L’Acebal.

Y si con esta ruta nun te paez suficiente, equí te dexamos la de Peña Mea, mui pronto a esta que t’acabamos de presentar.