El papel de les muyeres foi fundamental na minería dende siempre. Carboneras, escogedores, lampisteres, atropadores, aguadores, vagoneres, guardabarreres, pizarreres, escombreres… Toos estos y más son los trabayos que durante décaes ha estáu desempeñando la muyer nes mines. Ensin olvidar el trabayu de minera, daqué que fai un tiempo yera ilegal.
Según información obtenida en llibros de la Real Compañía Asturiana de Minas (RCAM), aparecen les que se consideran les pioneres de la minería. Sos nomes son Victoria Pérez, Josefa de la Cuesta y Teresa González. Fueron contrataes en setiembre de 1835 na mina de Arnáu, dos años dempués de so apertura. Tamién podemos rescatar información del inglés Richard Ford, el cual escribió el «Manual pa viajeros por España y lectores en casa», que tres visitar la mina de Arnáu, relató la insólita presencia de estes mineres. A día de güei esti hallazgo entá ye un misterio, causa de la poca información que hai al respecto.
A lo llargo de munchos años esistió un reglamentu que prohibía a les muyeres trabayar dientro de les mines. Esto nun torgó que lo fixeren, yá que mientres la Guerra Civil Española, munches d’elles ocuparon los puestos de los sos homes, que taben na cárcel, esiliaos o se fugaren. Tamién en munchos casos cuando estos quedaben de baxa. Esta norma acabó desaniciándose, pero non la costume, polo que siguió tando mal visto qu’una muyer baxara a la mina.
Por ello en busca de la igualdá y la reconocencia tenemos de destacar el nome de Concepción Rodríguez Valencia, más conocida como Conchi. Nun foi la primera n’enllordiase les manes de carbón, nin en baxar a un pozu, pero sí en llanta-y cara al sistema y consiguir una reconocencia llegal a dereches de la muyer a trabayar nel interior de la mina. La llucha qu’empezó en 1985 nun tuvo desenllaz hasta 1992 nel Tribunal Constitucional, consiguiendo a la fin esti derechu.
Gracies a el so enfotu, Conchi forma parte de les 100 españoles más destacaes del sieglu XX de la llucha pola igualdá. Ella representa a toes aquelles muyeres, que nun son poques, que magar les crítiques y al refugu per parte de la sociedá nun duldar en baxar a les mines.
Por esta llucha’l 17 de xineru de 1996, cuatro mineres entraron per primer vegada nun pozu de manera oficial con tolos sos derechos llaborales. Elles fueron María de los Angeles Llaneza, María Shirley Sánchez, María Virginia Domínguez y María del Carmen González.
Conoz la hestoria d’otres muyeres pioneres asturianes equí en VerAsturies.
