En plenu corazón de los Picos d’Europa, ente los llugares de Poncebos, perteneciente a Asturies, y Valdiós, yá en territoriu de Llión, atopamos la espectacular sienda de La Ruta’l Cares.
Ideal pal senderismu, les sos sensacionales vistes y el so prudente desnivel faen d’ella una traveseya fayadiza pa la práctica del senderismu.
La ruta estiéndese pela conocida como «Garganta Divina» del Ríu Cares, y trátase d’una pista a mediu altor d’alredor d’unos once quilómetros qu’escurre al traviés de covarones, pontes y senderos cincelaos na roca. Gran parte de la xente coincide en que ye la ruta a pie más increíble al algame de cualesquier persona, inclusive pa los más noveles del monte.
A lo llargo d’estos once quilómetros vamos poder almirar una riqueza paisaxística ensin igual, nun percorríu d’alredor d’unes cuatro hores que nun te dexará indiferente.
La so hestoria
Güei probablemente seya la ruta más conocida de los Picos d’Europa, pero’l pasu que bordia’l Ríu Cares foi, nos sos principios, un camín prácticamente esclusivu pa los pastores. Nun s’ameyoró hasta l’añu 1916 cola construcción de la canal. Hai que destacar l’impresionante llabor descomanada de más de 2.000 homes que fixeron posible la execución d’esti desafíu a la natura, munchos d’ellos alloñaos de los sos llares, trabayando de sol a sol demientres más de cuatro años no que foi una construcción realizada a 240 metros sobre’l nivel del ríu.
El principal oxetivu nun yera otru que’l d’abastecer la central hidroeléctrica de Poncebos, pero’l tresporte de los materiales pa llevantala obligó a ampliar el vieyu camín de cabres que güei ye visitáu por decenes de miles de persones cada añu.
Encamientos
Esta ruta, que puede faese con neños, encamentamos llevalos de la mano pa evitar que s’asomen al cantu del camín. Énte la falta de fontes, aconseyamos dir provistos d’agua, sobremanera pel branu, onde puen llegar a algamase temperatures altes. Nun escaezas llevar un calzáu cómodu.
¿Llistu/a pa esfrutar d’unu de los entornos paisaxísticos más increíbles d’Asturies?
