Nel conceyu de Cabrales, na espectacular zona de los Picos d’Europa, alcuéntrase una ayalga escondida que convida a ser esplorada: Mina Delfina. Esti sitiu non solo ye un testimoniu de la rica hestoria minera d’Asturies, sinón tamién un exemplu espectacular de la xeoloxía d’Asturies.
Mina Delfina, asitiada n’Ortigueru, Cabrales, ye una buelga de la dómina na que la minería del cobre yera una actividá económica crucial na zona. Na actualidá, ta desenvolviéndose, al traviés d’un Plan de Sostenibilidá Turística en Destín, la realización d’un centru de visitantes na llocalidá d’Ortigueru y la visita a la mina. D’esta forma, los visitantes van poder percorrer les sos galeríes y conocer de primera mano los trabayos realizaos polos mineros d’antaño. La mina caracterízase por grandes cámares soterrañes, que demuestren el métodu d’esplotación utilizáu pa estrayer los pervalibles minerales.
La contorna xeolóxica
La contorna xeolóxica de la Mina Delfina ye igualmente impresionante. Na actualidá, puede realizase una ruta circular d’aprosimao 6 quilómetros, na que se contempla’l paisaxe ablucante de Cabrales y otros elementos patrimoniales como la Capiya de Santuyano (Ortigueru) y les sos pintures murales. Amás, esta contorna natural ufierta vistes panorámiques de los Picos d’Europa y una bayurosa diversidá de formaciones xeolóxiques qu’incluyen dolines y óvales, resultáu del modeláu kársticu.
Dientro de la mina
Dientro de la mina, los visitantes, una vegada desenvueltu’l proyectu de visita a la mesma, van poder ver les vetes de minerales de cobre como azurita y malaquita, que destaquen colos sos colores verde y azuláu en contraste cola calcita blanca que les arrodia. Estos minerales dispónense en venes y filones, formando estructures espectaculares que son testimoniu de la rica mineralización de la zona.
Nun esfuerzu por caltener y espublizar esti patrimoniu, ta planiándose l’acondicionamientu de Mina Delfina pa la realización de visites dientro d’ella. Esta visita va ufiertar de forma interactiva una ruta pela mina, onde se va esponer la hestoria de la minería en Cabrales, mesmo que l’usu de les cueves polos nuesos antepasaos, especialmente les magnífiques representaciones d’arte rupestre que tenemos nel conceyu, como los bisontes de la Covaciella, o una relación col so usu actual como cueves de maduración del famosu quesu Cabrales. Amás, estes visites guiaes por espertos van dexar a los visitantes afondar na conocencia d’esti fascinante mundu soterrañu.
Nun pierdas la oportunidá d’esplorar la Mina Delfina, somórguiate na hestoria y el patrimoniu de Cabrales y na xeoloxía de los Picos d’Europa.
