Migaya
¿Préstente los sabores que te treslladen a momentos, llugares o, mesmamente a los platos que facía to güela? Casadielles, arroz con lleche, la tarta de quesu, los postres d’almendra… too aquello que pueas tener nel maxín ye’l motivu pol que nació Migaya, pa los y les más llambiones. Con una idea diferente y basándose nos raigaños y na cocina asturiana, empecipiaron nel añu 2020 con esti proyectu. Con un homenaxe al arte de Xixón, a les icóniques chapones asitiaes a la fin de la sablera de San Llorienzo, entamaron la so andadura con unes galletes de chicolate que simulen la so forma (¡tamién les chapines!). Depués, ampliaríen productos coles ‘roques’, una reinterpretación de los postres tradicionales en forma de bombón y, en Navidá, colos turrones de casadiella, tarta de quesu, almendra con naranxa, arroz con lleche… ¡De xuru que si los prebes nun vas dexar nin una migaya!
Puru Remangu
El remangu ye’l puxu, la fuercia o l’actitú pa facer les coses. Ye carácter. Poro, Puru Remangu ye la marca de ropa qu’usar como seña d’identidá pa ello. Al traviés de los sos productos vas poder abrir camín a reivindicar asuntos como’l feminismu o l’arguyu de la clase obrera asturiana. Puru Remangu ye una marca pa que vistas y uses cuando teas repunante o quieras facer les coses seliquino. Pa cuando quieras dir de romería o de folixa coles collacies. Les camisetes y los productos de Puru Remangu son pa toles persones que quieran ser lo qu’elles decidan. Y da lo mesmo la edá. Reciella, mocedá, xente mayor… da lo mesmo si yes de pueblu o de ciudá. Puru Remangu ye la ropa colo qu’amosar tamién l’arguyu de vivir n’asturianu. Porque más qu’una marca de ropa, ye una seña d’identidá cola que sentise arguyosa de los tos raigaños. ¿Llista pa reivindicar el remangu?
Avilés, ¡qué guapina yes!
Avilés, ¡qué guapina yes! ye una tienda asitiada na villa que da nome al negociu y onde vas poder alcontrar too aquello que necesites, con productos pa l’alcordanza d’Avilés y d’Asturies. En definitiva, productos n’asturianu de toa mena colos que podrás facer mui bonos regalos, seya la dómina del añu que seya. Esti comerciu, allugáu nel centru de la villa del Adelantáu, nació en setiembre del 2021 pa cubrir una necesidá de productu avilesín modernu y distintu, basáu na esperiencia personal y que piensa siempre na xente avilesín que vive lloñe, pero tamién en tou tipu de turistes y xente llocal. Avilés, ¡qué guapina yes! ye un negociu onde saben lo que vienden y sobre too por qué, una cosa mui importante a la hora de considerar la compra. Equí, vas alcontrar l’amabilidá de la so dependienta en cualesquier productu que necesites. Porque Avilés ye guapa, pero mercar en llugares como estos sofitando’l comerciu llocal, más.
Nordés Móvil
Nordés Móvil ye una compañía asturiana qu’ufre serviciu de telefonía ya internet. Ye una operadora que apuesta pol tratu cercano y de calidá amás de tener ente los sos principios el tener un impactu positivu dientru del mundu de la cultura y la economía llocal asturiana. Ye una compañía que trabaya col respaldu de les grandes cobertures de fibra y móvil y qu’ufre tarifes con precios mui competitivos, pudiendo ufrir serviciu de fibra na práctica totalidá del territoriu asturianu onde haya fibra desplegada. Si busques tener un serviciu de móvil ya internet con una compañía que reinvierta en sofitar la cultura y les iniciatives llocales d’Asturies al empar de tener un serviciu cercanu y a bon preciu, Nordés Móvil ye la to opción.
Ediciones Trabe
Si quies lleer lliteratura n’asturianu y esfrutar d’un bon momentu de llectura, namás has pensar en Trabe. Pa la reciella, traducciones, narrativa, poesía, ciencia ficción… tolos xéneros que tengas nel maxín tienen el so espaciu nel catálogu d’Ediciones Trabe. Creada en 1992 y con más de 800 títulos nel so catálogu, Ediciones Trabe ye güei una referencia nel mundu de les empreses culturales d’Asturies. D’ente les sos últimes publicaciones, destaquen Nós, los del Makulusu, de la colección de traducción Calume; El corazón cansado de la aldea. Voces y lugares de Somiedo o Un par de botes. Cuentos de fútbol. Amás d’editorial tienen tamién n’Uviéu la so llibrería propia dende l’añu 2019 na cai Fernando Alonso 17, baxu derecha. Ellí vas poder alcontrar el llibru que necesites, mesmo pa regalar que pa la to propia llectura. La to próxima llectura ta en Ediciones Trabe.
