Pa llegar a beber la sidra que toos y toes conocemos hai detrás un procesu bien llargu. Son dellos los pasos a siguir pa que la mazana se convierta na bebida asturiana más reconocida. Dos fases importantes son la ‘pañada’ y la ‘mayanza’, imprescindibles pa esfrutar de la sidra. Poro, vamos afondar nestos pasos qu’anguaño malapenes se ven, pero que ye importante caltener.
Los pumares asturianos suelen dase en praos onde crez la pación, que xeneralmente s’aprovecha pa segar y dar a les vaques como alimentu diariu. Estos praos enllenos de pumares llámense ‘pumaraes’, que precisen d’un cuidáu curiosu pa que seyan a producir tolos años, pues a un añu bonu suel siguir siempre otru de producción más ruina. Cuando l’añu yera de sidra, de muncha producción, movilizábase la familia pa facer la pañada de la mazana pela seronda, que solía entamar nel mes de setiembre.
La xente diba a la pumarada a pañar les mazanes en sacos o en maniegues y macones. Pañábense primero les mazanes que cayeran del árbol y que nun se teníen por mui bones pa la sidra, esto ye, les llamaes ‘mazanes del sapu’. Depués facíase más d’una pasada peles pumaraes pa ‘llimir’ o tirar con una piértiga les mazanes que quedaran nel árbol. Tamién podíen tirase les mazanes ‘esmenando’ o ‘solmenando’ con fuerza l’arbol coles manes.
Una vegada rematada la pañada, les mazanes había que les tresportar a un sitiu onde se conservaren ensin perdese pa poder facer la mayanza más tarde o, cuando convenía, llevales a dalgún llagar industrial que les mercaba pa facer sidra. Anguaño, esti llabor de tresporte ye muncho más prácticu y fácil, pero d’antiguo esti llabor, que llegaba a facese con carros de tracción animal, podía durar bastante tiempu, de manera qu’una familia podía andar carretando mazana hasta final d’añu o más allá en dellos casos.
Les mazanes pa facer sidra llévense al llagar. Ellí, hai que seleccionar les mazanes y meteles nos ochaos, pa saber con cuántu frutu pue cuntar la casa y cuánto hai que mayar de cada vez. Depués, échense les mazanes en ‘duernu’, que ye’l recipiente onde se maya. Anguaño, máyense les mazanes xeneralmente con un aparatu llétricu, llamáu ‘mayadora’, pero lo tradicional hasta hai unos años yera echar les mazanes en duernu y mayales col ‘mayu’, que ye un mazu de madera de mangu llargu y cabeza anchona que ruempe y estrapalla la mazana.
El trabayu de mayar ye duru abondo y, poro, en tiempos pasaos facíase n’andecha. Xuntábense entós los homes de les cases vecines y poníense a entrambos llaos del duernu, onde caún diba dando golpes col mayu pa desfacer la mazana. Coles mayadores modernes la cosa ye muncho más rápida y cómoda, porque les cuchielles que mueve’l motor mayen bien rápido les mazanes.
La mazana mayao échase con pales en pisu del aparatu llamáu llagar, o seya, na masera, faciendo que queden bien puestes y colocaes les mazanes mayaes. Pa ello, úsense pales de madera, anque tamién solíen emplegase madreñes bien llimpies, en dellos casos con un pisu especial pa esta función. Por ‘llagar’ entiéndese tanto l’aparatu que val pa esprimir les mazanes como’l llocal onde s’alcuentra esi aparatu. Ye nesti local, en llagar, onde se fai la sidra. Hai que dir mayando hasta que’l llagar tea enllenu de la masa de mazanes mayaes.Entós, enriba d’esta masa pónense unos maderos llargos llamaos ‘molleros’ y otros cortos llamaos ‘carneros’, que son los que presionen y fai que salga la sidra na parte baxa del llagar.
El resultáu d’esti procesu llargu, y parte imprescindible de la cultura sidrera asturiana que debemos conocer y caltener, ye esa sidra tan rico que constitúi ún de los símbolos d’Asturies.
