Dicen los playos que l’auténticu espíritu xixonés ta nel barriu Cimavilla y que tolo que ta más allá, l’antigua Baxovilla, nun ye más qu’un Xixón descafeináu. Pocos barrios n’Asturies tienen la fuerte identidá propia de la que presumen los playos y les playes (xentiliciu pol que se conoz a lo pobladores del vieyu barriu pescador de Xixón)
La identidá playa construyóse dende va milenios, cuando esta península, que llegaba a ser islla nes marees altes, yera’l llugar perfectu pa complicar la entrada d’invasores na ciudá. Sicasí, esto nun impidió que Cimavilla recibiera a otros pueblos a lo llargo la hestoria que dexaron la so buelga na ciudá, yá dende los romanos, que dexaron ente otres coses una fábrica de salazón, debaxo de l’actual Plaza’l Marqués y unes termes, güei visitables sol Campu Valdés.
Cimavilla camudó abondo nel mediu sieglu últimu, de ser un barriu pesquín y de cais escures a convertise nuna cuidada zona residencial, na que básicamente hai trabayu na hostelería, el turismu y los servicios. Un barriu que percorren cada añu miles de turistes que quieren prebar la sidra y la gastronomía asturiana nos munchos y bonos chigres qu’atopes en toles placines.
Frente a la mayor de les places, El Campu les Monxes o Plaza’l Llavaderu, llevántase l’edificiu que fuere primero conventu de les Agustines y dempués de la desamortización, dende 1842 y hasta 2002, fábrica de tabacos
Esta edificiu, que ta n’obres dende va unos años, plantega agora’l futuru del barriu de Cimavilla con dellos proyectos que quieren convertir a Cimavilla nun espaciu que siga atrayendo turismu y al mesmu tiempu pueda convertise n’abellugu d’empreses creatives
Animamoste a percorrer el barriu y a descubrir les munches ayalgues qu'entá conserven.
