Pa la xeneración que creció nos 80, y parte de la que lo fixo nos 90, pocos referentes hai más enraigonáu a la infancia que la mítica serie de Barrio Sésamo, la adaptación del programa americanu Sesame Street creáu pol siempres recordáu Jim Henson y que trunfó en tol mundu. El programa consistía nuna serie de sketches grabaos pol equipu americanu que se repartíen por tol mundu, protagonizaos por personaxes yá clásicos na memoria de munchos (la xaronca Gustavo, Epi y Blas, Coco, el monstruu de les galletes…) «presentáu» (por dicir) en cada país por personaxes creaos ya interpretaos específicamente pa cada llugar. Equí, los maestros de ceremonia fueron Espinete y Don Pimpón. Ente que'l manexu del corpuspín corría al cargu de la actriz manchega Chelo Vivares, a Don Pimpón dába-y vida Alfonso Vallina, un actor que nació en Mieres l'añu 1942.
Esti mierense metiñose nel mundu del espectáculu nel añu 1972, con papeles n'obres de teatru importantes d'aquella dómina. Estes obres lleváronlu a introducise finalmente nel mundu audiovisual, participando en series de gran ésitu de la televisión de los años 70 como El Pícaro, Curro Jiménez o El restablo del flautista, con pequeños papeles que pali que pali fueren ganando más protagonismu. Tamién participó en cine con directores de prestixu como J. Antonio Bardem (Siete días de enero) o incluso Pedro Almodóvar (La ley del deseo)
A finales d'esta década, en 1979, entró como parte del equipu de Barrio Sésamo, participando nes pruebes de cámara de los moñecos de Barrio Sésamo, asistiendo a esplicaciones del manexu de los guiñoles impartíes por trabayadores del taller de Jim Henson. Anque empezó interpretando al cascoxu PerezGil, finalmente foi sustituyíu por Jesús Alcaide, y él acabó interpretando a un personaxe llamáu "Manolo el mecánico".
Finalmente, nel añu 1983 l'equipu del programa propón-y ser parte del elencu principal con un nuevu moñecu queprotagonizaría la siguiente temporada xuntu al corpuspín Espinete. Mandáronl-y fotos frontales, llaterales y detalles del actor al taller de Jim Henson, qu'a base de caricaturizar el so aspeutu físicu (ñariz, melena y barba) basaron nél el personaxe que marcaría pa siempres a delles xeneraciones: Don Pimpón.
Dempués d'esti personaxe, la carrera d'Alfonso Vallejo sigue tando xunía al mundu del espectáculul. Anque participó en películes como El Bola o Manolito Gafotasfueren más les sos apaiciones en televisión en series conocíes como Médico de Familia, Periodistas, La que se avecina o El ministerio del tiempo. Per otru llau, siguió siempres amestáu al teatru, de que los sos escenarios nunca se baxó.
