Yá ta mui cerca unu de los díes más importantes del añu en tola vida de los sierenses, pero tamién de munchos asturianos. El 17 de xunetu miles de persones de dellos puntos d'Asturies van dir a parar a Siero pa esfrutar d'una fiesta, el Carmín de La Pola, que bate récords d'asistentes añu tres d'añu.

La fiesta empecipia'l xueves de la selmana anterior col pregón que tien llugar, anguaño, nel Auditoriu de La Pola Siero. Na zona del parque suel instalase'l ferial. La gran romería, el Carmín, tien llugar el llunes siguiente al Día del Carmen, col correspondiente desfile encabezáu por charanga a los cinco de la tarde dende'l barriu de Les Campes hasta'l prau de La Sobatiella. Ellí trescurre la tarde coles distintes peñes y grupos hasta qu'al anochecer tien llugar la baxada del prau hasta'l centru de Pola de Siero, onde se celebra la verbena xunto al Mercáu de Abastos y darréu nos distintos puntos partíos pol cascu antiguu. 

Nació esta fiesta en 1695, nel qu'Andrés Quintanal y la so muyer María García, vecinos de La Pola Siero y devotos de la Virxe del Carmen, costearon la construcción en Rióles-yos d'una ermita dedicada a esta Virxe, formándose una Confrería so la advocación del Carmelo. Cunten les cróniques que-yos costar 12.000 reales, que se bendixo'l 17 de Julio d'ese mesmu añu, esto ye, a otru día de la festividá de la patrona y propúnxose celebrar la festividá l'añu 1696.

Taba asitiada dicha ermita ente les castañales qu'ocupaben l'actual Plaza de Les Campes, y al llau del camín que siguíen los pelegrinos en dirección a Santiago de Compostela. Los cofrades, que yeren perabondosos y de tola provincia, festexaben a la so patrona'l domingu siguiente al 16 de xunetu, si esta fecha nun cayía en domingu, celebrando xuna procesión na que, ente otres demostraciones, executóse, hasta'l primer deceniu d'esti sieglu, la danza o baille de “los Danzantes”, y na que s'esibíen numberosos “Ramos”, costume esta que perduró hasta l'añu 1879.

Pero yera tal l'asistencia de cofrades el domingu, que foi necesariu entamar una segunda fiesta'l martes, día del mercáu de La Pola Siero, pa que pudieren festexar a la so patrona los devotos del conceyu. Y asina, llegamos hasta'l Carmín d'anguaño, una fiesta que ye símbolu de los polesos y d'Asturies.