A lo llargo de los 80 y 90 del pasáu sieglu, según se acercaba’l cambéu de mileniu, popularizóse en tol mundu la música new-age, na que predominaben los sintetizadores electrónicos en compañía de instrumentos tradicionales y asina foi como se fundió cola Música Celta, de la mesma una etiqueta comercial pa definir les músiques del llamáu Arcu Atlánticu, tantu tradicionales como contemporanees de raigañu. Asina se dieron a conocer grupos como Clannad n'Irlanda, Capercaillie n'Escocia o Dan ar Braz en Bretaña, cuna del pioneru del xéneru, Alan Stivell. N’Asturies podríen representar esta fusión d'estilos los primeros discos d’Hevia y en Galiza Carlos Núñez. La puxanza de la música celta empezó a decaer yá entráu'l nuevu sieglu y na última década dio pasu a otres corrientes del folk más minimalista o puramente tradicional.

Nesti sentíu'l grupu asturianu Guieldu intenta volver a esi folk ecléctico y fundío, bien “vintage” con composiciones y arreglos propios sobre la base de temes tradicionales de los países y rexones celtes, y nun podía ser d’otra manera: Asturies tien un protagonismu especial.

El soníu de Guieldu apartase del purismu predominante, entemeciendo lo acústico y lo electrónico, lo tradicional y lo nuevo en conmovedores balaes y tamién animaes melodíes bailladeres que pueden gustar a un públicu bien variáu.

Guieldu toma'l so nome d'una palabra del asturianu. “Dir al guieldu” o “tar al guieldu” significa dir a la viesca a poles castañes que tira'l vientu. El grupu ta formáu por: Susana Sors (voz y guitarra), Héctor Aneiros (flautes), Celia Nieto (violín), Jorge Álvarez (bouzouki), Pablo Santamarta (baxu), Laura Méndez (teclaos) y Gabriel Catalán (batería). Toos ellos músicos mozos ente los 18 y los 28 años, lo qu'apurre frescura interpretativa y en ciertu mou hasta visual.

Anguaño Guieldu prepara'l so repertoriu nos locales d'ensayu y creación “René de Coupaud” de Xixón cola idea de poder ufiertar conciertos a partir de la segunda metá del 2021. Tamién trabayen na edición dixital del so primer senciellu en plataformes online que va ver la lluz a primeros d'añu.