El grupu L’Esperteyu prepárase pa la edición númberu ventiséis del popular Festival Folclóricu en L’Entregu, qu'anguaño va cuntar cola participación del grupu ‘Fonduxe de Aragonia’, de la provincia d'Uesca, y como novedá cola incorporación de la banda de rock ‘Gatuñazu Rock de Práu’ pa poner el ramu al zarru d'esti eventu tradicionalmente de baille.
El festival va tener llugar el sábadu 2 d'avientu, nel Teatru Municipal, a partir de les 19 hores, nun actu que va empezar col saludu del alcalde de Samartín del Rei Aurelio, José Ramón Martín Ardines, y que se preve que pueda retresmitise en directu dende la canal de YouTube del Conceyu, al que tamién se podrá aportar dende la páxina municipal en Facebook. La entrada ye de baldre.
Primeramente, si la meteoroloxía dexa, tanto'l grupu L’Esperteyu como Estirpe de Aragonia van desfilar peles principales cais de la localidá de L’Entregu. “Van venir dende l'Altu Aragón p'amosanos el so folclor y tradiciones mañes, y sobre manera la so popular xota aragonesa, que sigue'l so camín pa ser declarada Patrimoniu Cultural Inmaterial pola Unesco”, esplicaron dende L’Esperteyu.
Tocantes a Gatuñazu Rock, “ye una banda de Llangréu, de recién creación, que funde preseos típicos del so xéneru con preseos tradicionales asturianos, mesmo que na lletra de los sos cantares”, añedieron.
El festival va celebrase nel marcu de les Fiestes Gastronómiques de Les Cebolles Rellenes, que festexen en L’Entregu, ente'l 30 de payares y el 3 d'avientu. El grupu L’Esperteyu tien una llarga tradición como agrupación folclórica qu'esportó la identidá cultural asturiana fuera d'Asturies y d'España al traviés de la so participación nos distintos festivales nos que participa tolos años. Anguaño compónenlo un total de 57 persones y cuenta con un grupu específicu de pandereteres.
