Cientu trenta millones de pesetes foron les que llevó ETA (pm) del atracu al Bancu Herrero n'Uviéu, hasta la fecha'l más grande d'Asturies, pero non l'únicu d'esti tipu.

Asocedió va cuarenta y dos años y foi ún de los mayores efectuaos enxamás n'España l'atracu que, na madrugada del domingu ochu al llunes nueve de xunetu de 1979 acabó con cientu trenta millones de pesetes menos na sucursal del Bancu Herrero de la cai de Fruela, n'Uviéu. L'oxetivu taba claru: financiar la llucha armada del grupu terrorista por mediu del asaltu a entidaes de diversu tipu, como primeramente yá se fixera nel Hospital Xeneral d'Asturies, n'ochobre de 1978, o, el 5 de mayu de 1969, nel Hogar de San José. D'aquellos atracos previos, efectuaos a punta de pistola, ETA llevárase un montante de más de venticinco millones de pesetes, amás d'un escasu alixu d'armes procedente de los guardes del Hogar, y unes amistaes que taben por morrer fai, precisamente, agora cuarenta y dos años: los CAR (Comités d’Aición Revolucionaria), l'intentu más estremu, pero curtiu, d'un nacionalismu armao asturianu.

Infinidá de flecos entrelácense nesta hestoria de la Transición pola cual l'acción armada izquierdista volvía a actuar n'Asturies, como nos años venti fixeren -anque dende otru puntu de vista ideolóxicu, otres formes y otros matices- los llibertarios qu'atracaron el Bancu d'España de Xixón (1923) o la Banca Maribona avilesina (1932). De cuenta que vamos intentar resumilos como buenamente podamos: resultó qu'esa madrugada, un grupu de pistoleros irrumpió na casa del apoderáu de la oficina del Bancu Herero, reteniendo a los sos familiares y llevándo-y a él pa faer de particular ‘caballu de Troya’ a la sucursal de Fruela. Un atracu silencioso y paciente, efectuáu a primer hora de la mañana, cuando los emplegaos empecipiaben a llegar y utilizando les llaves del caxeru y de dos apoderaos pa abrir la caxa fuerte. Lleváronse tolo qu'había nella: cientu trenta millones de pesetes. 

Pero los etarres nun actuaron solos. De diecinueve atracadores, siete yeren asturianos y militantes de los Comités d’Aición Revolucionaria, el brazu armáu -dizque tamién involuntariu- del CNA (Conceyu Nacionalista Astur). La intervención de los nacionalistes asturianos tendría consecuencies desastroses pal proyeutu que, dende sectores más moderaos, impulsaben otru tipu d'asociaciones: tres delles selmanes escondíos na casa d'unu d'ellos y colos millones escondíos nuna casa de San Cloyo, los terroristes fueron arrestaos y xulgaos severamente non solo polos tribunales, sinón tamién pola opinión popular. Les penes bascularon ente la absolución pa dos de los atracadores y los ventiséis años pa Juan Emilio Carvajal, que cumplió trece.

El dineru, destináu al pagu de les nómines de los mineros que s'habríen d'efectuar tal día como güei, va cuarenta y dos años, nunca nun apaeció de vuelta. Lo propio fadría, tamién, el CNA, bien tocáu pol sucesu, por más qu'intentara desvenceyase de los CAR. Asocedió en 1979, pero les consecuencies, como ven, fueron múltiples y llargues nel tiempu.