Alberto Rodríguez nació na localidá mierense de Returbiu nel añu 1972. Ye llicenciáu n'interpretación pol Institutu del Teatru y de les Artes Escéniques (ITAE) en Xixón. Tamién realizó diversos cursos para completar la so formación con profesionales como Arnold Talaborelli o Esperanza Abad.
Empezó la so carrera collaborando cola mayoría de les compañíes de teatru d'Asturies. Gracies a ello, tuvo nomáu en delles ocasiones a los Premios «Asturies» de Teatru. Amás en 2004, foi galardonáu col Premiu al Meyor Intérprete Masculín pol so trabayu nel musical «Sesfebú». Tamién trabayó nel cine en películes como «Carne de Gallina» o «La torre de Suso«.
Alberto gana la so fama gracies a la televisión. El momentu nel que tuvo la mayor reconocencia foi nel programa «Terapia de grupu» na TPA. Nesti programa tenía'l papel de presentador y amás dio vida a personaxes conocíos como La Marquesina o Lucas Castañón. Nesta mesma cadena tamién presentó'l famosu programa «De Folixa en Folixa» nel que percorría les distintes fiestes y celebraciones de toa Asturies. Otru programa del que ye coproductor y copresentador ye'l concursu «Superasturianos". La confianza nel so talentu pal humor y la improvisación quedó nidia cuando s'apostó por él en Universo Rodríguez, un late night al estilu americanu ensin escaecer los raigaños asturianos que se punxo en marcha en 2018.
Va poco, presentó "Tú a la playa yo a la montaña" xunto con Camilo Sousa tamién en TPA, amás de delles gales y entregues de premios.
Siempres combinó'l so trabayu en televisión colos sos monólogos en solitariu y el teatru. Amás, participó activamente con asociaciones culturales y de festexos y amuesa gran interés pola cultura asturiana.
