¿Sabíes qu'Asturies cunta con unes particulares Médulas, de muncho menor tamañu y al traviés de cueves, como Llión? Tán nel occidente d'Asturies y güei, en VerAsturies, enseñámoste As Covas da Andía y te dicimos cómo poder visitales.

¿Qué son As Covas da Andía?

Declaraes Monumentu Natural nel añu 2002, As Covas da Andía atópense asitiaes a 8 km. d'A Caridá, en Andía, parroquia d'Arancedo. El monumentu natural asitiase nun valle abelugáu, de roca caliar, onde hebo una esplotación aurífera de dómina romana (S. I ya II dempués de Cristu). Esos trabayos mineros dexaron a la lluz galeríes kárstiques que, a lo llargo de más de 500 millones d'años, l'agua abrió nel interior de la formación caliar. La singularidá microclimática d'esti espaciu, favoreció la formación d'un monte trupo y avesío, onde s'entemez la vexetación atlántica y mediterránea. Too ello da llugar a resaltes predresos con elevaes parés verticales, fondes canales onde esguilen les formaciones arbóreas, mantos de magres impermeables, formes caprichoses de cuévanos con trazaos curvos, perfiles nidios y mineralizaciones qu'apurren una gran gama de colores.

Los grandes carcavones que s'abren nes sos fasteres son productu del vaciáu mineru causáu al abasnar, cola ayuda de l'agua enriada dende los montes, les roques y sedimentos que contienen l'oru. Estes mines tuvieron actives mientres los sieglos I ya II d.C.

Cómo llegar y realizar una visita

Darréu, cuntámosvos cómo llegar y cualos son los horarios de visita, una y bones la única manera de poder aportar a elles ye con visita empuesta y reserva previa.

Dende A Caridá, vas tener que tomar la FR-1 escontra Arancedo y conducir per ella alredor d'unos seis kilómetros. Una vegada ellí, va haber que tomar la esviadura señalizada a la izquierda escontra As Covas da Andía mientres aprosimao dos kilómetros.

Nel horariu d'iviernu (1 d'ochobre a 30 de xunu) pueden visitase en Selmana Santa, Ponte del Pilar, Ponte de Tolos Santos, Ponte de la Constitución, Ponte del 1 de Mayu. Sábados y domingos la visita ye pela mañana a les 12:00 y pela tarde a les 16:00 hores.

Nel horariu de branu (1 de xunetu a 30 de setiembre) puede visitase de martes a domingu. La visita pela mañana ye a les 12:00, mientres que pela tarde ye a les 16:30 hores.