El cordal de Peña Mayor ta asitiáu ente los conceyos de Nava, Llaviana y Bimenes. Los sos cumes más destacaos son el Trigueiru o Torrexón de Breza (1291 metros), Les Tremes (1270 metros), Los Garamios (1251 metros), Picu Texíu (1250), Peña Mayor (1141 metros) y Llanos d'Ortigal (1091 metros), principalmente.
Los accesos más comunes pa xubir a Peña Mayor son por: Melendreros (Bimenes), El Condao, La La Ferrera y La Robellá (Llaviana) y Piloñeta (Nava). Tamién dende la collada de La Faya los Llobos, na carretera de La Pola Llaviana a Martimporra. D'antiguo xubíase dende la mesma capital sidrera d'Asturies, Nava, al traviés de Piloñeta y Les Praeres, anguaño xuníes per pista pa vehículos duros. Al Trigueiru, xuben los vecinos de Llaviana y Sobrescobiu, principalmente por El Condao y La Ferrera. Tamién por La Robellá y pola collada de Breza, ente los cumes del Trigueiru y el Texíu.
La Faya los Llobos, enantes bien frecuentada pa dir a tou esti cordal, yá lo ye menos, anque hai tamién pista para touterréns. Lo más cómodo ye dir al cume que da nome al cordal, Peña Mayor, dende Melendreros.
Si salimos de la capital del conceyu de Bimenes (Martimporra), y nos esviamos en Rozaes, vamos llegar en pocos kilómetros a Melendreros. Nesti llugar empezamos la caminada per caleyes. Si vamos de frente podemos llegar en pocu tiempu a Fayacava, onde hai un abellugu, como en Breza; y siguiendo daqué más, al Pozu Funeres. Nel abellugu de Fayacava atopábase una faya al pie de un antiguu caseríu, si se xira pola pista a la izquierda, en dirección norteña, tómase'l senderu pa xubir a Peña Mayor.
Si pel contrariu coyemos un camín que sal a los pocos metros de dexar el pueblu de Melendreros, a la izquierda al pie de un bebederu, nuna hora y a pasu sele, vamos llegar al Tarnu y La Campa, onde hai una vieya caseta forestal. Dende ellí, n'otra hora más d'ascendente caminada coronamos el cume de Peña Mayor. Nesta ascensión hai que tener curiáu coles piedres sueltes y nun perder la sienda, nin arimase al derribadoriu, yá cerca de lo cimero.
Dende'l cume acolúmbrase una estensa panorámica. Al nordeste los montes del Sueve y Cayón y, antes, a los nuesos pies, los pequenos picos del Redondu, Orosu y La Varallonga. Al este los cordales de Ponga y Piloña y los Picos d'Europa. Antes, tamién bien próximos, el Picu Bomalu y les foces del Pendón. Al sureste la sierra del Crestón, el Picu Retriñón y el Monte Llaímo. Más cercanos a nós, nesa mesma dirección, toles cumes del propiu cordal de Peña Mayor y la Peña la Xamoca. Más escontra l'oeste y el macizu de Ubiña y la sierrra del Aramo. ¡Tou un espectáculu de montes y valles!
El descensu aconseyamos facelo pel mesmu llugar de la xubida, reponiendo fuercies na collada La Campa o mayada del Tarnu. Per esta zona, frecuentada por cérvidos y xabalíes, pasa la trayida d'agües de la fuentona de Los Arrudos a Xixón. Disponiendo d'una instalación de control na fastera oeste de la peña o Picu Orosu, enriba del mayáu del Tarnu.
Adéntrate a conocer más rutes, equí en VerAsturies.
