Quirós ye unu de los conceyos asturianos que tien poca población. Sicasí, esto nun ye motivu pa que nel so territoriu nun tenga llugares preciosos. Unu d'ellos ye Bermiego, un pueblu de monte qu'acueye elementos tan espectaculares como'l «Teixu la Ilesia». Güei, en VerAsturies, escapamos a Bermiego.
El Teixu de Bermiego
Ye l'emblema del pueblu y les sos dimensiones llamen l'atención: 13 metros d'altor, 6,82 metros de diámetru y 15 metros de diámetru de copa. Cunta la tradición que mui cerca d'ellí pasaron les reliquies de l'Arca Santa, nel so llargu periplu dende Xerusalén hasta la Catedral d'Uviéu, y ye probable que seique esti teixu o un antecesor suyu fuera testigu d'esti históricu itinerariu… Y ye qu'esti teixu ta consideráu como'l más antiguu de Asturies y unu de los más antiguos d'Europa. Al so llau, ta una guapa ermita, advocada a Santa María.
Caleyar pel pueblu
Caminando peles cais de Bermiego vas poder atopar auténtiques xoyes etnográfiques somorguiáu nun paisaxe que paez sacáu d'un cuentu medieval. Ente elles, destaca'l conxuntu d'horros, hasta 32 que daten inclusive del sieglu XVI y con talles úniques. Tamién ta'l extinto carbayu o rebol.lu, que va unos años viénose abaxo, pero entá se recuerda. Otros elementos interesantes son l'antiguu molín o la ermita de la virxe del Carmen.
La capiya de la Merced
Si lo tuyo ye'l senderismu, dende Bermiego puedes llegar a la capiya de la Mercé entamando una caminada. Nel camín de La Mortera, atópase la capiya de La Mercé onde, el 23 de setiembre, se celebra romería con procesión, misa n'asturianu, carrera de cintes a caballu y puya del ramu de pan d'escanda.
Cómo llegar a Bermiego
Llegar a esti pequeñu pueblu ye bien cenciellu dende la capital d'Asturies, yá que s'atopa a 30 minutos d'Uviéu. Dende la ciudá, vas tener que tomar la N-634 en dirección a Trubia, pa tomar l'AS-229 y siguir el so trazáu hasta llegar a la esviadura a la izquierda que nos va llevar, al traviés de 4 kilómetros hasta'l pueblu pola QU-6.
