De los munchos montes d'especies arbórees autóctones qu'había n'Asturies fai tan solo un sieglu, unu d'ellos ye'l de La Marea, tamién conocíu como Monte la Carbazosa y, equivocadamente, como monte de La Muriosa.

Pela siempres guapa tierra piloñesa llégase a esti monte al traviés de la carretera qu'enllaza la so capital, L’Infiestu, con El Campu, (AS-254) per La Collá Arniciu. En pasando pol santuariu de la Virxe de la Cueva y, escontra'l kilómetru once, antes de la xubida fuerte p'Arniciu, nel pueblu de La Marea, tómase una caleya que sigue enriba'l ríu Coballón. Los paisanos denominen a esta pista o sienda como'l Camín del Coballón.

El ríu Coballón crúciase en delles ocasiones por rústiques pontes. Yá de primeres, en cuenta de tomar la caleya, enfrente d'un chigre puede travesase'l ríu La Marea, y darréu el Coballón, por curiosos pontes, más bien tueros sobre'l caudal d'agua. La dirección a siguir ye al oeste, casi tol tiempu, anque a la fin ye pal sur; y polo xeneral per bon camín. Hai un ramal que sigue escontra'l noroeste, pal Arrudu y La Xamoca, monte que vamos tener casu tou el tiempu a la vista, al frente, si'l día ta despexáu, y cubierta d'un monte.

Siguiendo pel camín, siempres el ramal de la izquierda, y xubiendo selemente, vamos llegar al cabu d'una hora a un encruz de senderos, onde hai una portiella que da a una gran pradería, pola que baxa un regueru. Anque'l camín ta bien marcáu y empedráu, hai quien prefier travesar pel prau, pos el destín final ye'l mesmu, al sur, na mayada de Pandu l'Árbol, onde hai unes cabanes de pastores, arrodiando la gran pradería que s'atopa nel centru del monte. Esti ye un llugar maraviyosu.

Pel camín, daqué zarráu n'ocasiones pola vexetación, tárdase un cuartu d'hora, en dirección suroeste, en llegar a otru encruz de senderos: el de la izquierda va a la citada mayada y pradería, y el de la derecha xube a otru mayáu, el llamáu Llanu Les Corcies, al que puede llegase n'otru cuartu d'hora d'ascendente caminada. Dende esta mayada vese perbién y cercana la Peña la Xamoca. El monte yá nos quedará embaxo, como'l ríu Coballón, del que yá nos dixebremos barganal de la citada portiella que da al prau del Pandu l'Árbol.

Puedes descubrir rutes nueves, como esta de Peña Mea equí, en VerAsturies.