La cima de Peña Mea a 1560 metros, llindando los conceyos de Llaviana y Ayer, ye unu de los montes más característicos del Altu Nalón. Son variaos los caminos pa xubir a esta peña, tanto pol conceyu d'Ayer, como pol de Llaviana. Los más fáciles seríen los que parten de los pueblos de Pel.luno, Tolivia y Fresnéu. Y del altu de La Collaona, en plena carretera de Cabanaquinta a La Pola Llaviana, dende onde sal un senderu hasta cerca Les Campes.

Vamos rellatar l'itinerariu que parte del pueblu ayerán de Peḷḷuno. A esti llégase por un ramal de carretera que sal de la xeneral de Morea al puertu de San Isidro, que se toma na localidá de Ḷḷevinco.

En Pel.luno hai dellos caminos pa llegar a la collada d'igual nome. Tamién hai una pista de tierra bien marcada pola que podemos dir si nun nos empobinamos bien o escarecemos d'un bon guía. De toes formes los paisanos pueden indicanos los antiguos senderos pastoriles que conducen dende'l pueblu a la collada, y que son los más curiosos pa dar un paséu pola Naturaleza.

Nuna hora de caminada llégase tranquilamente dende'l pueblu de Peḷḷuno al Colláu Peḷḷunu. Na collada hai bones fontes y formoses mayaes de pastoréu, onde se ven abondoses cabeces de ganáu na dómina braniza. Dempués de reponer fuerces puede acometese yá la xubida a Peña Mea. Por marcaos caminos va xubise dexando a la izquierda los picos del Traveséu, El Fermosu y Cuetu Vegalláu. Embaxo vamos dir dexando les cabanes o mayaos de La Collá y Carballosa, enfusándonos nuna cañada, o estrechura, cortada na roca, llamada canga del Arcu. Otra d'estes cortaes o «canalones» va quedanos un pocu más delladiada, pero por ella tamién puede dise. Nesta zona, a estes cañaes o gargüelos denomínense col nome de cangas: canga del Utre, canga del Osu, canga del Arcu…

Tres una hora, aprosimao, de pindia ascensión pola canga del Arcu vamos llegar a otra collada. A la nuesa esquierda vamos ver una buraca o ventanón en plena roca, conocíu como Arcón de la Finistra, o tamién, el güeyu de Peña Mea. Dende ellí baxa un empináu camín a Les Campes. Nesta collada xúntense los caminos que van a Pel.lunu, Les Campes y Doñangu. Nesta zona hai que tener precuru en casu de borrines, pos ye fácil perdese.

Dende esi puntu n'otra hora, o daqué menos, d'ascendente caminada, llégase yá a lo cimero de Peña Mea siguiendo la dirección este. Podemos enfrescanos enriba cola agua d'una bona fonte y dexar la tarxeta de cumes nel so buzón montañeru. Esta tradición paez qu'anguaño se ta perdiendo nes cimes asturianes, por ignorancia o acciones de los gamberros.

Dende la cimeade Peña Mea, en día despexáu, pueden acolumbrase panorames impresionantes. Al este, quédennos les sierres de Mermexa, Crespón y del Retriñón, y más cercanos los montes de Pandiella, Carbellosa y Forcada. Y los escobios del ríu Raigosu, gargüelu del Polo y foz de Coveyayos. Al norte tán los valles del ríu Nalón y el Picu Montarru. Tamién tán les aldegues de Los Tornos, Roxil, Fombermeya, Campomoyáu, Pumará, Grandiella, Fechaladrona y Fresnéu. Coles mesmes atópense nesa zona, les citaes Villoria y Tolivia. Al oeste, La Collaona, El Navaliegu y Les Campes, cola so ermita. Al sur, amás de los pueblos de Ḷḷevinco, Peḷḷunu, Santibanes, Entepenes o Cabanaquinta, tán los valles de los ríos de San Isidro y Ayer. El cordal de Murias y Santibanes, y daqué más alloñada'l Cordal Cantábricu, nel sector entendíu ente los puertos de Payares y San Isidro.

Hai munchos valles y cimes, dellos cubiertos de montes d'especies arbóreas autóctones. Nellos abonden los cérvidos, xabalíes, mustélidos, amás de numberoses aves, anfibios y reptiles.

El regresu puede faese pol mesmu itinerariu, o por Les Campes, Doñangu, vallina de l'Agua, Les Fuentes, mayáu del Xierru,L'Enquilón, Corral Perreru, Brañanieva y Fechaladrona; o per La Collaona. Per esta zona crúciase una importante vía histórica, calteniéndose ente otros restos les pontes de traza romana de Villoria y La Ponte d’Arcu.

Si te prestó esta ruta, nun queden ensin descubrir otres diferentes, equí en VerAsturies.