Ye la forma más xeneral d'abonar les tierres y faise col cuchu o cuitu. El cuchu sácase tolos díes de la corte onde tán les vaques y ye un de los llabores necesarios por que la corte onde viven les vaques tea llimpia y fresca.
Coles vaques, igual que nun pueden dexase ensin catar, nun puede pasase tampoco ensin sacar el cuchu de la corte. El cuchu en munchos casos nun vien namás de les vaques, sinón de lo que resulta d'entemecese col rozu o estru que se-yos pon a les vaques para echase.
El cuchu poner nun sitiu determináu (cucheru, cuiteiru, cucheiru, pila cuchu) onde va quedando hasta que se tresllada a les tierres pa cuchales. El cuchu va dexándose en montones para más tarde espardelo pela tierra que quier cuchase.
Pa quien trabayen el campu, el cuchu ye la fuerza que da vida a la tierra y noten enforma la diferencia ente los terrenos abonaos y non abonaos. Bona seña d'esta importancia que-y dan a cuchar les tierres ver na imaxe tan representativa del mundu llabrador asturianu colos homes llevando el cuchu del cucheru a les tierres. Esta ye tamién la imaxe que representa perfectamente la conexón ente la ganadería y agricultura; ente'l mundu de les vaques y el mundu de los cultivos.
Anguaño esta imaxe ta camudando porque amás de los nuevos medios pa tresportar el cuchu a la tierra, agora les cuadres tienen un depósitu a onde va'l mexáu, que dempués va espardiéndose por aspersión con una cuba que tien un mecanismu apropiáu pa cubrir tola superficie que quier regase.
Na cultura asturiana refléxase'l poder del cuchu, por exemplu, el refraneru asturianu ta llenu de frases sobre'l cuchu en tolos ámbitos. El proverbiu más conocíu ye'l que diz Dios y el cuchu pueden muncho, pero sobretoo’ l cuchu. Pero hai más que refuercen esta idea: Con cuatro coses podrá l’ aldeanu coyer munchu: cuchu, cuchu, cuchu y cuchu.
Dende'l portal oficial Facebook de la plataforma PlayPresta puede esfrutase de la vida agrícola y ganadero asturiana de la mano de Saúl, un mozu amigu de la vida de campu, onde curia y mima la tierra. Equí en La Casería hai capítulos dedicaos a la ganadería onde puede vese el cuchu o catar les vaques.
