El pintor xixonés Evaristo Valle interesóse pol mundu del antroxu y reflexólo nes sos pintures constituyendo unu de los temes más característicos. La temática apaeció llueu nes sos pintures y tuvo una llarga evolución onde pueden falase de cuatro etapes: 1) Primeres mazcaraes; 2) Mazcaraes de transición; 3) mazcaraes madures y plenes, y 4) Mazcaraes de posguerra.

Ye difícil atopar elementos etnográficos nesti tipu d'obres. Sicasí, puede vese la influencia del tiempu que vivió en La Pola Siero y en Noreña onde tuvo en contactu colos guirrios y los sidros.

Los guirros y sidros yeren comparses de mozos y mocess qu'ente Navidá y el día de Reyes percorríen distintos pueblos faciendo representaciones y pidiendo l'aguilandu. Los sidros nun son esclusivos de la zona de Siero. Tán n'otros conceyos asturianos con característiques similares y recibiendo otros nomes como zamarrones o bardancos.

Anque hubiera mazcaraes n'otres zones d'Asturies les qu'influyeron en Valle fueron les de Siero. Sicasí, nenguna de les sos obres reflexa de forma íntegra los personaxes d'estes celebraciones. El pintor namás representa elementos individuales, sueltos y n'ocasiones elementos concretos o característiques xenerales de les mazcaraes ivernices. Dientro de la obra llamada «Los guirritos» pueden reparase dos clases de vestimienta; los guirrios y la compuesta a base de pieles d'oveya blanca. Dambes indumentaries son de la zona de Siero mesmo que d'otres zones asturianes. Como peculiaridá dientro de la producción de Valle puede señalase l'ausencia de figures que nun porten les llueques, caracerística principal de los sidros.

Dientro de les creaciones d'Evaristo Valle sobre l'antroxu puede destacar «Carnavalada en Cimadevilla» onde'l personaxe central lleva colgáu de la cintura dellos pexes. Les figures de manera común lleven un cucuruchu o capirote na cabeza, y n'otres ocasiones visten con zalees. Valle tamién pintó «Carnavalada de los osos» y «Carnavalada de los lobos», nesti casu nun quixo concretar ónde los viera. A lo llargo de tola so creación atópense los personaxes típicos como'l diañu, los «chabasqueiros» y «basoiros» nel Occidente, el ceniceru», el «Cipriano, l'hoxalateru», la vieya o la dama. El que más destaca siempres ye'l sidru qu'apurría movimientu y dinamismu a les pintures, una característica esencial de les sos pintures.