Güei en Ver Asturies traémosvos de nueves una ruta que se puede facer tanto a pie como en bicicleta, anque vos recomendamos esta postrer opción. Trátase d'una ruta que percuerre la Vía Verde de Lluniego dende'l corazón d'Uviéu y que s'allarga alredor de 39 quilómetros.

Como vos dicimos, la ruta principia n'Uviéu, na estación de tren de Llamaquique, dende onde vamos tomar dirección p'hacia'l Parque d'Iviernu. Dende equí, vamos entamar a allonxanos de la ciudá, tomando la senda p'hacia Fuso de la Reina, pero que vamos dexar cuando aportemos al desvíu de La Manxoya pa bordiar el bosque de la Zoreda, onde tán los restos d'una antigua fábrica d'esplosivos, y vamos aportar al pueblu de Picuyanza.

Una vegada qu'aportemos a esti puntu, va principiar un descensu hacia'l pueblu de Lluniego, una baxada qu'hai que facer con cuidáu poles sos pendientes que lleguen al 14%. En Lluniego, si quies conocer la so hestoria, vas poder visitar la so capilla de San Pelayo, la ponte medieval o el palaciu de los Bernaldo de Quirós. Dende Lluniego vamos enllazar con otru senderu, pasando per Les Segaes y Bueñu y siempres cola bona compañía del ríu Nalón, que trescurre paralelu al senderu. Dende Bueñu, vamos tomar dirección p'hacia Palomar, pa dempués aportar a Les Caldes y esfrutar del so castiellu.

Cuando temos equí, volveremos tomar el senderu de Fuso de la Reina que, tres un paséu pela naturaleza, va devolvenos a la gran ciudá.