Dicen que los caballos son un de los animales más nobles qu'esisten. Dende va años acompañen al ser humanu en viaxes, aventures y momentos especiales. N'Asturies, amás, pueden atopar grandes ayalgues a los que namás ellos lleguen: ríos, montes de sueñu, montes… Una esperiencia inigualable qu'ensin dulda vas tar deseyando repitir, colos guíes que meyor conocen los rincones d'Asturies: los caballos.
Zauber Rutes
En ZAUBER RUTES comuníquense dafechu colos sos amigos, los caballos. Al traviés de la doma natural, trabayen con ellos dende los primeros años de vida pa que, pali que pali, apriendan lo que van precisar mientres la so vida adulta. Nesti proyectu qu'entamaron en ZAUBER RUTES, los sos fundadores tán naguando por compartir con toos nós el so amor y pasión polos caballos.
Pa ello, amás de clases d'equitación y residencia pa los caballos, ZAUBER tamién nos ufierta rutes a caballu per cualesquier parte d’ASTURIES. Unos paseos que puede facer tol mundu, siempres que nun tenga torgues graves para montar y pase de los cuatro años d'edá. Antes d’entamar, recomiéndennos l'usu de ropa y calzáu cómodo, amás d'un cascu de seguridá obligatoriu qu'ellos mesmos nos apurren.
Ente les opciones que nos ufierten, taríen les rutes d'una, dos o cuatro hores. Tamién esiste la posibilidá del día completu. Ye fácil velos pasiar pel monte de Deva, un camín prestosu pa pasiar ente montes o pela vera del mar, cuando nun ye temporada de branu: una manera guapo y distinto d'esfrutar d'un día de sablera.
Cuesta de Guaricio s/n, Marcenao, Siero
Telf: 663 033 197
Email: zauber.rutes@hotmail.com
Horariu: Tolos díes de 10.00 a 20.00 hores
Asturias a caballo
ASTURIAS A CABALLO ufierta una esperiencia inolvidable al llombu d'esti noble animal. Corvera, Uviéu, Llanera o Les Regueres, son dalgunos de los conceyos más habituales que suelen percorrer, anque ufierten los sos servicios por tol percorríu asturianu, eso sí, previu encargu y en grupos d'hasta cinco persones.
Podemos escoyer ente delles opciones: dende unes rutes curties que van dende les dos hores(una guapa ruta estándar pa xente que nun monta davezu), hasta un día enteru, (con posibilidá d'una pausa pa estirar los músculos), pasando per una ruta qu'ocuparía una mañana o bien, una tarde (unes cuatro hores). Tamién tenemos la posibilidá de rutes más llargues, pasiando mientres toa una fin de selmana, pudiendo pasar una nueche nun camping, una cabaña o un abelugu de monte. Inclusive, previu encargu, podríamos pasar dellos díes nunes vacaciones inolvidables. Pa estes rutes más llargues con un estáu de forma mínimu y un pocu d'espíritu aventureru ye suficiente.
Seguro que Hera, Tutatis, Eclís, Jara y Gurriana, los caballos que curia personalmente Caye, van tar encantaos de faete esfrutar del paisaxe d'Asturies a los sos llombos.
Lugar Villanueva de Villapérez, 2, bajo, Uviéu/Oviedo
Telf. 647 521 294
Email: asturiasacaballo@gmail.com
Horariu. Tolos díes de 10.30 a 22.00 hores
Babieca
En Vega, atopamos BABIECA, una empresa que nos ufierta la posibilidá de guianos hacia los sitios más guapos d'Asturies y dexanos ablucaos cola nuesa naturaleza. En Babieca, los precios son zarraos, porque la idea principal ye que lo pasemos bien y esfrutemos al máximu del caballu, ensin tener que dir mirando'l reló. A partir de setiembre, les rutes son personalizaes y esiste la posibilidá de terminar el paséu na sablera.
Disponen de dos zones pa les rutes: la primera ye pela zona de Villaviciosa. Si la to idea ye esfrutar d'un paséu a caballu, pero nun tienes muncha esperiencia, Babieca ufierta unes rutes fáciles n’Argüeru, que pueden ser d'una a dos hores, variando'l preciu de 18 a 30 euros per persona, respectivamente.
La segunda opción llévanos a la parte de Ribeseya. Saliendo de la sablera de Vega, subimos a caballu pola Sierra del Sueve hasta'l Picu La Forquita, ónde vamos poder ver les sableres de Caravia, Arenal de Morréis, La Isla y Llastres. D'ende, baxando pela ladera inferior del Mirador del Fitu, vamos ser testigos d'un paisaxe ablucante, compuestu pelos Picos d'Europa, Ribeseya, el Picu Urriellu.....unes vistes qu'ensin dulda paga la pena ver en directu, y que pueden esfrutase n'unes rutes circulares d'ente trés y cuatro hores, (cuarenta euros/persona),o ente cuatro y cinco hores(cincuenta euros/persona), que'l so únicu oxetivu ye pasar un día inolvidable.
Vega, Ribeseya/Ribadesella
Telf.: 600 241 918
Email: rutasbabieca@gmail.com
El Dorado
EL DORADO ye la empresa de rutes de paséu a caballu más antigua de Cangues d'Onís. Con ellos, vas poder acaballar pelos caminos más guapos y desconocíos de los Picos d'Europa, yá que lleven trabayando estes rutes tan interesantes y orixinales dende l'añu 1989.
Cualquier persona, ensin conocencies d'hípica previos, puede esfrutar ensin problema d'estes rutes, gracies al bon entrenamientu de los caballos. Un guía, qu'acompaña al grupu tol camín, va esplicar les coses básiques de cómo tratar al caballu. Ye aconseyable, eso sí, llevar ropa y calzáu cómodo, asina como pantalón llargu.
Disponen de delles rutes pa poder esfrutar de la naturaleza más auténtica de los Picos d'Europa, atravesando ríos, viesques y montes: pueden ser d'una o dos hores, o llargues escursiones, ónde ellos encárguense d'agospiamientu y comida. En casu d'escoyer la ruta de dos hores, esfrutaríes d'una curtia parada pa tomar un culín de sidra en Corao, dempués de pasiar pola preciosa aldea d’Isongu y la capiya de Santu Mederu, para llegar a Celoriu al traviés d'un guapu paséu pela vera del ríu.
Sotu Cangues, Cangues d’Onís
Telf. 629 875 061
Email villarrodrigo.eldorado@hotmail.com
Horariu. Tolos díes de 9.30 a 21.00
Equusfera
Ensin danos cuenta, 2021 ta a la vuelta la esquina. Va ser un añu perespecial, yá que ye Xacobeo. El Camín de Santiago ye una esperiencia máxica ya inolvidable, pola que tol mundu tendría de pasar, siquier, una vegada na vida. EQUUSFERA ufiértanos la posibilidá de facer d'esti viaxe, entá, daqué más especial.
Cruciar Galiza d'Este a Oeste a caballu promete ser una esperiencia tan memorable como suena. Y si esto te paez pocu, nun te esmolezas, porque en EQUUSFERA tán dispuestos a llevate, lliteralmente, al fin del mundu: dende Ozcos hasta Finisterre en 10 díes.
Amás, ufiértennos otres rutes pol suroccidente d'Asturies, pasiando per caminos que davezu percuerre l'osu cantábricu nel Parque Natural Fontes del Narcea, Degaña y Ibias. Y tamién pol espectacular Parque Natural de Ancares-Courel.
Per otru llau, tamién ufierten rutes más curties nos enclaves naturales antes citaos con salíes dende Taramundi o Vilarchao. D'esta forma, vas poder conocer non namás los sos paisaxes, sinón tamién les lleendes qu'éstos escuenden. Les rutes son aptes pa tolos públicos, tengan o non esperiencia.
Los sos caballos tienen la suerte de vivir tol añu en llibertá, n'estenses camperes polo que los sos caballos tán sanos y equilibraos, tantu física como psicolóxicamente. ¿Vas perdete esta esperiencia?
Mazonovo, Taramundi.
Vilarchao, A Fonsagrada.
Telf.: 616 753 929
Email: info@equusfera.com
