Cada selmana vas poder atopar en VerAsturies.com les recetes llambiones de la escritora Beatriz Rato.
Ingredientes:
Pa la masa: 200 gramos de farina, 100 gramos de mantega, 3 cuyaraes d’azucre, 4 cuyaraes d’agua.
Pal rellenu: 50 gramos de pases de Corinto, dos mazanes, 30 gramos de piñones, canela en polvu, dos cuyaraes d’azucre.
Procedimientu:
Allandiar la mantega nel microondes 10 segundos, axuntar col azucre y l’agua y añidir a pocoñinos la farina trabayándolo coles manes. Desque seya una masa fina, dexar posar media hora.
Mientres tantu, cortar les mazanes pelaes en daos pequeños y axuntales a les pases, los piñones, l’azucre y la canela (más o menos abondante, según gustos.
Dividir la masa en tres partes equivalentes; estender dos partes con un rodillu nel mármor enfariñáu y pasar a un moldiu engrasáu. El moldiu ideal pa esta receta ye enforma cuadráu, grande y colos cantos baxos. Pinchar bien la masa con un tenedor y cubrir cola miesta de les mazanes y los otros ingredientes.
Espurrir como anantes la parte de la masa acutada y con un cuchillu cortar tires de hacia un centímetru de ancho y dir asitiándoles enriba el pastel preparáu, unes en sentíu vertical y otres cruciaes porriba, formando el texíu d’un cestu; nun tien de tapase dafechu el rellenu, tien que vese un pocoñín ente los cuadraos que formen les tires.
Cocer a fornu bien forte hasta que dore la masa.
