Esti xixonés llicenciáu n'Hestoria del Arte, dedicó gran parte de la so vida profesional a la didáctica nel Muséu del Pueblu d'Asturies de Xixón y ye espertu en moda.
Un llugar pa perdese una fin de selmana… Pravia, sede regia... una villa sele que convida al descansu y al vermú sele. Tien bien bona gastronomía y una contorna sobeyosa pa pasiar. La so Colexata ye un de les maravíes arquitectóniques d'Asturies.
Un llugar pa vivir… Ensin dulda, Xixón. Una ciudá de contrastes con un nerviu y un espíritu qu'atrapa. Una ciudá con una hestoria industrial y comercial bien potente. Una superviviente. Soi xixonudo hasta'l migollu, equí vivo y equí voi morrer si Dios quier.
Un platu… Tener claro, un platu de oricios. Un manxar que m'allegra la vida.
Un postre… Unes freses de Candamo con nata de La Ibense.
Una playa pa pasar el día… La sablera de Bayas. ¿Esiste daqué meyor na vida que tomar el sol y bañase desnudu? Definitivamente, ¡non!
Un pueblín que nun podemos dexar de ver… San Xuan de L'Arena. Ellí crecí arrodiáu de muyeres ente'l golor de los pinchos morunos que llegaben del Gurugú y les riques angules que preparaba la mio tía Luisa y que güei yá son hestoria polo que cuesten. El vermú veraniegu polos chigres cercanos a la Rula ye de lo meyor del branu.
Un chigre pa tomar unos culinos… Cualquiera de la Plaza de Requejo en Mieres o de Cimadevilla en Xixón
Un parque natural pa visitar… Parque Natural de Somiedu. Ablucante
Una fiesta a la que nun faltar… El Xiringüelu.
Un muséu pa recomendar… El Muséu del Pueblu d’Asturies, un de los museos etnográficos más importantes d'Europa. Un espaciu nel que se curia, protexe y espubliza'l nuesu patrimoniu. Un patrimoniu que nos identifica y del que tenemos que tar arguyosos.
Un momentu de la hestoria d’Asturies que te prestaría vivir… Yá que trabayé munchos años nos museos arqueolóxicos de Xixón, pos me gustaría vivir na dómina romana y conocer de primera mano cómo yeren les termes y qué otros edificios había…
Un baille pa pasalo bien… La Danza Prima que presta.
Una pallabra n’asturianu que te preste… pues esa, prestoso…
Una tradición que nun pue perdese… les romeríes
Una espresión n’asturianu que te preste… ¡Calla, ho!
