El director Gaizka Urresti, nomináu al Premiu Goya a la Meyor Película Documental 2020, presenta Aute Retrato en Xixón esti sábadu 7 de payares a les 19:30. Esta actividá va tar incluyía nel marcu del POEX 2020, Alcuentros de Poesía en Xixón.
Falar de Luis Eduardo Aute ye falar d'un de los creadores más prolíferos qu'esisten: dende compositor ya intérprete hasta dibuxante, poeta y cineasta con una amplia y reconocida temática nes sos obres: l'erotismu, l'amistá, l'amor, la mística, l'humor y el compromisu políticu.
Aute Retrato ye un llargumetraxe qu'homenaxa a tola obra del artista madrilanu esbillada al traviés de los sos testimonios y de los sos amigos y collaboradores.
Too ello acompañáu de los sos cantares, que punxeron soníu a delles xeneraciones, con versiones inédites interpretaes por Dani Martín, Rozalén, Marwan, Ana Belén, Joaquín Sabina, Joan Manuel Serrat, Jorge Drexler, Ismael Serrano y Víctor Manuel, ente otros. A la fin del llargumetraxe, va haber un coloquiu del director col públicu.
Por cuenta de les nueves restricciones derivaes de l'actual situación sanitaria, esta actividá va ser retresmitida en directu al traviés de la canal de YouTube de la Rede Municipal de Biblioteques.
