Munches vegaes buscamos rutes y escapaes bien lloñe de la ciudá coles mires de desconectar arrodiáu de naturaleza. Sicasí, cerca de sitios como Uviéu, Xixón o Avilés hai munchos planes arrodiaos de la naturaleza y ensin salir, prácticamente de la ciudá. Ye'l casu de la sienda del Peñafrancia, nel conceyu de Xixón. Güei traémosvos esta ruta pa qu'esfrutes prácticamente ensin salir de casa.
Una ruta pa tolos públicos
El nuesu percorríu empieza na rotonda de La Guía (Somió) y dende ellí a Les Mestes, onde'l ríu Peñafrancia desemboca nel ríu Piles. Caminando por esta ribera vamos percorrer tol trayectu del ríu.
La sienda adéntrase nes veres del regueru, que nos empobina hasta'l campu de golf d'El Tragamón. Una pequena cuesta diríxenos escontra la carretera d'El Tragamón. Cruciamos la carretera pa siguir trayectu pol camín de Los Maizales, dexando a la nuesa izquierda La Carbayera’l Tragamón, impresionante monte de carbayos centenarios.
Entramos na parroquia de Cabueñes, nel que'l paisaxe tórnase dafechu rural. La sienda va salir a la carretera Santurio, que siguimos unos metros pa cruciala aína, al llegar a la finca na que s'alcuentra la capiya de La nuesa Señora de la Corrada.
Pasamos a la zona denominada La Charca, llugar estupendu pa facer un altu al pie de la fonte La Castañal. Depués cruciamos la carretera d'El Trole, pa siguir pola caleya’l Molín, en pasando una pequena ponte. Saliendo a la carretera, aína entramos na parroquia de Deva, dexando tras la esviadura que se dirixe al camping municipal siguimos so la solombra d'altos carbayos, que señalen la entrada a la denominada Quinta’l Conde, de siguío, almiramos la ilesia parroquial de San Salvador de Deva.
La sienda remata nun espaciu paradisiacu: el Güeyu Deva, conxuntu de fonte, llavaderu y ponte de piedra, onde les agües remansen en gran estanque. Del güeyu del que naz el regueru, cunta la lleenda que salíen les xanes, apaeciéndose en San Xuan, cuando podíen ser desencantaes, símbolu del cultu a la diosa celta de la naturaleza Deva, adorada en fontes y ríos. La so fiesta, l'ocho de setiembre, coincide cola de La Santina, y quiciabes por ello ye puntu del fin de la sienda del Peñafrancia y de partida d'una transitada ruta d'andaniegos y pelegrinos: el famosu Camín de Cuadonga. Y si non, siempres puedes buscar otres rutes, como la ruta De Yernes a Cuallagar, una ruta pa perdese nel corazón d'Asturies.
