El pueblu incomunicáu y perdíu ente los montes d'Asturies, por antonomasia, siempres foi Bulnes, pero agora yá ta comunicáu por Poncebos per mediu d'un tren de cremallera o funicular, que pasa so Peña Maín, por un túnel covanosu en plena roca caliar del Parque Nacional de los Picos d'Europa. Bulnes era hasta fai poco'l pueblu cabraliegu ensin accesu rodáu, que los sos vecinos reclamaben costantemente. Ellos queríen una carretera, o pista pa touterrenos, pero pensaben pone-yos teleféricos. Y, según el proyectu de dalgún “llistu” ¡trés remontes mecánicos a falta d'unu!, a saber: de Poncebos a Bulnes, de Bulnes. Pandébanu y de Bulnes a Amuesa. Agora tien un tren so tierra.
Tampoco tenía esti pueblu hasta va poco tiempu lluz eléctrica, anque sí teníen yá últimamente delles plaques d'enerxía solar o fotovoltaiques. Tampoco teníen médicu o centru de salú, nin escuela, nin cura, nin nada de nada. Dende va un llustru yá tienen casi tou o puedan llegar a ello con facilidá, de mano, yá disponen de teléfonos. Con esti panorama nun ye raro qu'ellí namás vivan agora unos pocos vieyos y los hosteleros.
Pa llegar a esti pueblu'l camín normal, a pie o en caballeríes, siempres foi al traviés del escobiu que forma'l ríu Bulnes, ente los contrafuertes de Peña Maín y el murallón d'Amuesa, conocíu pola canal del Texu o salíes de Bulnes. Esti camín construyíu a la manera de sienda romana tomar en Poncebos, al llau del Cares, del que'l ríu Bulnes ye afluente. Ellí, a la fin del gargüelu de Cares, hai una ponte de la Edá Media, llamada La Xaya, que crucia sobre les agües color esmeralda del Cares, siendo esa ponte l'empiezu de la sienda al pueblu de Bulnes. Antes de tomala nun yera nada raro ver, hasta va pocos años, nel mesmu Poncebos, debaxo d'un túnel materiales de construcción o piensos y otros elementos d'intendencia ellí depositaos, polos vecinos de Bulnes pa dir xubiéndolos pola empinada sienda al llombu de caballeríes, yá qu'esti yera'l so únicu mediu de tresporte. El funicular camudólo tou nesti sentíu.
Si queremos dir a Bulnes pa facer una visita a eses nobles xentes, siempres abnegaes y voluntaries p'ayudar a los montañeros n'apuros, vamos tomar esta sienda na citada Ponte la Xaya, en Poncebos, pasando al pie de una cabana y dempués por una rustica ponte sobre'l ríu Bulnes. La sienda xube ente grandes derribadorios, siempres arrodiada d'impresionantes muralles de roca, mientres el rio enchente quédase no fondero. Coles mesmes, debemos de tener curiáu de nun recibir roques que pueden esprendese de riba. La sienda va xubiendo en zigzag, per un suelu de piedra suelta
Al cabu d'una hora, o pocu más, d'ascendente caminada vamos salir de la canal del Texu para llegar a Bulnes. Lo primero qu'atopamos ye la salida del túnel del funicular, depués llégase al campusantu y a una rústica capiya, siguíu de modestes cases y un chigre. La xubida al barriu d'El Castiellu (onde se piensa que pudo esistir un castru) puede faese dende'l barriu de La Villa o un pocu antes, pos cerca del túnel del funicular sale un senderu ascendente, en cruciando una rústica ponte sobre'l ríu Bulnes.
Hai quien piensa que per quí pudo haber una vía histórica, bien antigua, por eso'l topónimu El Castiellu (o Castru) de vixilancia del camín, la sienda empedrada, La Villa so la fortificación militar y l'escapar por esi itinerariu los moros qu'escaparon de la famosa batalla de Cuadonga, en dirección a La Liebana.
Dende Bulnes, pola canal de Balcosín y dempués y dempués pola canal de Cambureru, podría dise hasta la base del Urriellu, la Vega Urriellu, nunes trés o cuatro hores d'ascendente caminada, pasando de primeres, xuntu al pueblu, pola cascada de Les Mestes. Tamién puede dise a esi llugar más fácilmente por Pandébanu, al traviés del camín o sienda deColláu Valleyu. Pa llegar a Pandébanu vamos xubir per un senderu dende'l mesmu pueblu de Bulnes, en media hora, y a los pocos metros yá puede vese la parte cimera del Picu Urriellu dende ellí. Otra ascensión dende Bulnes, con guía espertu, pue ser al murallón de Amuesa, nun par d'hores.
