Nel mundu del deporte nun vimos hasta apocayá como les muyeres ocupen puestos de reconocencia, y tamién premios. Sicasí, a lo llargo de la hestoria hubo delles muyeres qu'intentaron romper el molde nun intentu de llograr los derechos de la muyer. Una d'eses muyeres yera asturiana, nadadora y llamábase Esther Sastre.
La hestoria d'esta nueva nadadora asturiana (anque d'ascendencia arxentina) treslládanos a un periodu d'inestabilidá n'España, concretamente a 1930, un añu antes de la proclamación de la segunda república y añu nel que se va a rematar la dictadura de Primo de Rivera. Cuando'l branu taba dando les sos últimes rabotaes, el 12 de setiembre de 1930, asocedió'l finxu d'Esther Xastre. Nesta fecha celebróse en Xixón el que naquellos momentos considerábase'l mayor derby de natación d'Asturies: dos quilómetros y medio nadando nel Cantábricu, la Travesía del Musel a Xixón. Foi equí onde Esther, con apenes 20 años, diba convertise na primer nadadora en participar na mentada competición, corriendo amás cola desventaxa del so bañador, yá que les prendes de muyeres pesaben el doble que les de los homes. Esther nun ganó la carrera, pero sí la remató y pasó a ser la primer muyer en realizala, siendo la protagonista de los periódicos na mañana siguiente.
La so fazaña foi un pasu pequeñu más na consecución de llogros pa la muyer, polos que tovia anguaño se sigue lluchando.
